Vawiin khan Mizoram Finance Commission chuan Aijal Club-ah a tum khat nan ‘Consultative Workshop’ a buatsaih a, hetah hian political party hrang hrang aiawh te, University atanga mithiam thlanchhuah te, sorkar-a hna sang leh pawimawh chelh tawh, tawnhriat ngah IAS leh Service dang senior officers hlui te, Autonomous District council leh Aizawl Municipal Council aiawh te, NGOs aiawhte leh mithiam dangte nen tualchhung sorkar te mipui tana tangkai zawka an kal theih dan tur chungchangah inrawnkhawmna an nei.
He inrawnkhawmna hi Finance Commission Chairman Pu Vanhela Pachuau, IAS (Rtd) in a kaihruai a. Pu Lalthansanga, Member Secretary-in sawifiah ngaite a sawifiah a. Mizoram Finance Commission hian a hnathawhna tur (Terms of Reference) atan data tam tak a mawmawh a, chung data lakkhawm dan tur kalphung (format) chi hrang hrang tam tham zet duang chhuakin, Mizoram sorkar atang te, Aizawl Municipal Council atang te leh Autonomous District Council pathumte atangin data a dil khawm mek a ni. Mizorama Village Council 757 leh Aizawl Municipal Council hnuaia Local Council 83 te hmasawnna lama an dinhmun hriat nan zawhna 43 lai hmangin chipchiar takin a zir chiang mek a; chubakah chuan North Eastern Hill University-a Prof. Emeritus C.Nunthara hmangin Village Council te chunghcang zirchianna research project a kalpui mek bawk.
Mizoram Finance Commission hnathawh tur zingah tualchhung sorkar ten anmahni mawhphurhnate tha taka an hlenchhuah theihna tura state sorkarin kum 5 lo awm tur chhunga (2015-16 atanga 2019-20) sum a sem dan tur ruahmante leh tualchhung sorkarte hnena mawhphurhna pek belh tur rawt te chu a langsar a ni a. Commission hian khaw tin veng tin ten khuarel chhiatna tenau (leimin, etc.) an pumpelh theih nan leh chutiang chhiatna an tawk a nih pawha an hmachhawn theih dan tur rawtna siam te; mahni huamchhung theuha thing leh mau nungcha an humhalh theihna atana rawtna siamte leh mipui sum reng reng, hman a nih chhan ang taka hman a nih theihna tura veng leh khaw tin ten mit leh beng an lo chhit a, an lo venpui theihna tur remchang sorkar hnenah an rawtna an siam dawn a ni.
