Dy. Commissioner & District Magistrate, Aizawl District chuan vawiin khan a hnuaia mi angin thuchhuah a siam a ni :

“Education Department-in Zirtirtu, Voluntary Retirement Scheme (VRS)-a chhuakte hnawhkhahna tur exam buatsaih a tum a thulh leh chungchangah mi engemawzat Chief Minister Office lamah zing dar 10:00 vel khan an pungkhawm a, chawpchilh takin Chief Minister hmuh an duh tih an sawi a. Chief Minister hi programme neia zin chhuak tep a nih avangin hmuh a rem lova. Chutah representation-te pawh midangte tihdanin hnutchhiah mai thaa a lan laiin Chief Minister zin chhuak tur chu a Bungalow gate thlangah an lo dang ta a. Hemi chungchang hi Deputy Commissioner, Aizawl leh SP, Aizawlte hriattir an nih veleh Law & Order kengkawh turin Magistrate-te leh Police ten a hmun pan nghal a ni a, Law & Order kenkawh zui nghal ani ta a ni.

Heng exam tur te hian an thil hriat duh ber nia lang chu “Exam thulh chhan leh engtikah nge an exam theih hun tur” tih hi a ni a. Exam thulh chhan hi chu a hma zanin Chanchin tharah puan vek anih bakah Chanchinbuah te pawh chhuah a ni a. Chief Minister a zin chhuah hnuah, heng mite hi an la pun khawm zel avangin an hruaitute leh Director of School Education inbiakna Niagistrate leh Addl. S.P.-te ruahmanna a neih a ni a, hetah hian exam tur hi thulh loh theih loh anih dan leh thil awmdan chiang taka hrilh fiah an ni.

Heng exam beih tum ten an lungawi lohna an lan tir hi chu a awm viau laiin Chief Minister, Head of the State meuh zin tur dang (restrain) zawnga hma an la hi chu a awm lovin dan kalh anih avangin hnawh kian loh theih loh an ni. Hmanni lawkah kan State opposition party lian ber pawhin kawng an zawh a, he kawngzawh hi muanawm taka neih zawh a ni. Hei hi kan State changkan tawh zia tilangtu pakhat a ni. He tih laia buaina siam zawnga lungawi lohna lantir hi chu District Administration tana en liam mai mai theih a ni lo a ni. Tun hnuah pawh buaina siam zawnga lungawilohna lantir tute chungah Dan leh Thupek kengkawhtu ten a tul dan ang zelin an hna an thawk ang.”