Vawiin chawhnu dar 2:00 khan NLUP Conference Hall-ah Chief Minister Pu Lal Thanhawla hovin AH & Vety Department hnuaia 3^rd  Phase NLUP dawngtute tana vawk note sem mek chu sawiho a ni a. AH & Vety Department report danin vawk note 48,978 sem turah December 2016 thleng khan vawk note 8394 sem tawh a ni a. A bak 48,250 sem hmabak a la ni.

A thawh khatna atana beneficiary 8163 tan Mizoram chhunga vawkte 24,489 mamawh chu hmuh theih ngei an in beisei a. Detailed report hi January 20, 2017 ah hmuh an beisei. Report hmuh hnuah NLUP hnuaia vawkte sem theih zat hriat chian a ni ang. Thla tawpah progress review neiin kal zel dan tur ruahmanna siam nise tiin rel a ni.

Sial leh Bawng vulhtute hlawhtlinna avangin lawmawm a tih thu Pu Lal Thanhawla chuan a sawi a. Se khan hungna tur thirzai se vulhtu khua ten an dilna ngaihtuah sak tha a tih thu a sawi.

Sial/Bawng vulhtute tana ran chaw uar zawka ching turin Vety Department in ruahmanna lo siam se, Central Scheme atanga sum hman theih remchangte dapin ran chaw tha ‘green fodder’ hmanga bawng vulhna kalpui dan tur ruahmanna Chief Secretary hovin siam nise tiin rel a ni bawk.

Vawk vulhtuten hlawkna tha zawk an dawn theihna tura vawk chaw siamna khawl a rang lama ngaihtuah nise tiin Chief Minister chuan a sawi bawk.