Vawiin khan FCS&CA Minister Pu John Rotluangliana chuan Nghalchawm Secondary School (RMSA) Building a hawng. 

Khuallian Pu John Rotluangliana, bialtu MLA ni bawk chuan hawnna inkhawmah hian thu sawiin Pathian zarah School Building thar hawn thei ani chu lawmawm tiin, School Building sak anih theih nana Khawtlang hruaitute leh Nghalchawm khaw mipuite inpekna chu fakawm a ti a, an chungah lawmthu a sawi a ni. 

Minister chuan kalkhawm mipuite chu fuihin “Ram hmasawn tur chuan, a chhunga cheng mipuiten zirna hi tihtak zetakanbuaipui a ngai a ni” a ti. Hemi atan hian zirlai leh zirlai nu leh pa ten mawhphurna an neih theuh thu tarlangin, thiam tak tak tumna nei a zirlai ngaih pawimawh a tul thu a sawi a ni. Lekha thiam pawimawhna sawiin bialtu MLA chuan “Eng hna pawh thawk dawn ila, lekha thiam chuan a ngaihna an hre bika, an hlawhtlinpui nge nge thin’ a ti. 

Hna zawn leh hmuh chungchangah lekhathiam pawimawhna sawiin “Mizoramah hmasawnna a kal mek zel a, hmasawnna ruangam chi hrang hrang rawn la lut tur a tam a, chu chuan hna thawh tur tam tak a rawn thlen dawn a, chu hmasawnna rawn lut tur lo hlawkpui theih dan ber chu lekhathiama lo in chher hriam hi a ni” a ti a. Thiamna nena hmasawnna kan lo hmuah loh chuan hna lian zawk leh hna tha zawkte chu ram pawn leh hnam dang miten min chuhsak mai a hlawhawm thu a sawi a ni. Mizoram ti hmasawn zelturinthalaite an pawimawh thu sawiin, Sawrkar in zirna in leh Zirtirtu tha tak a pe a, Zirlaiten an zirlai tha taka zir a, an mawhphurna chu rinawm taka hlenturina chah. School chu nunkawng dik zawh nana tangkai taka lo hmangturinNghalchawm mipuite hnenah a hlan a ni. 

Pu Francis Zokailiana, Engineer, RMSA chuan Technical Report pe in, Nghalchawm Secondary School Rmsa Building chu kum 2014 a sak tan niin, April 5,2016 a sak zawh a ni a, a sak nan hian RMSA sum cheng nuai 40 vel hmanral anih thu a tarlang a ni. School Building ah hian Classroom 2 sq.ft.20 a zau a awm a, hei bakah hian Headmaster Room, Teacher's Room, Library, Art & Craft Room, Laboratory leh Computer Room a awm bawk a. Room te hi Pianphunga Rualbanlote tan pawh wheelchair a awlsam taka luh theih tura siam a ni a.Rikrum thila tlanchhuah na tur Emergency Exit siam bawk a ni. 

Pu Lalthakima Colney, Teacher, Nghalchawm Secondary School in School chungchang Report pe in Nghalchawm Secondary School chu kum 2012 a zirlai 15 nen a tan a nih thu a tarlang a. Kum 2016-2017 ah zirlai 29 nei in, matric Exam hmachhawn tawh zirlai 20 an nei a ni.

Pu C Vanlalrova, VCP, Nghalchawm in khawtlang aiawh in thu a sawi a, bial ngaihsaktu Pu John Rotluangliana hmalakna chaktak chu fakawm tiin, School Building bakah Nghalchawm Community Hall sak zawh anih theih nan a ngaituahna leh tha sengtu bialtu MLA chungah Nghalchawm khaw mipuite aiawh in lawmthu a sawi a ni. School Building thar chu Nghalchawm khawtlang tan malsawmna thlentu a nih ngei a beisei thu a sawi a ni. 

Hawnna inkhawm hi Pu Lalnunthara, Dy DPC, RMSA, Mamit District in a kaihruai a, Pi Rinsangpuii, Headmistress, Nghalchawm Secondary School in lawmthu sawina in hun a khar a ni. School Building hawnna inkhawmah hian RMSA Official, Nghalchawm khawtlang hruaitute leh Nghalchawm khawtlang mipui leh zirlai Naupang an tel tha hle a, mi hrang hrang hnen atanga thusawina leh malzai ngaihthlak ani a, intihhlimna te thlirho niin tlai lamah ruai nen Pathian hnena lawmthu sawina hun hman nghal a ni.