Vawiin chawhma dar 11:00 khan NLUP Conference Room ah NLUP Vice Chairman Pu P.L.Thanga hovin District tin DC office - a NLUP Nodal Officer te leh NLUP Line Department hrang hranga hruaituten NLUP hnuaia ram allotment leh record siam dan tur an sawiho a. NLUP beneficiary te tana ram pek dan leh record mumal buatsaiha LSC thlenga kalpui dan tur te, NLUP zaupui ram theh dan te, ram ngaw chi hrang hrang humhalh dan leh enkawl zel dan turte uluk takin an sawi ho a ni.
NLUP hnuaia ram pek dan te, ram area felfai zawka teh fela record siam dan te, Revenue Department, LAD Department, Forest Department te DC leh VC te hmalak mekna awmze nei zawka kalpui dan tur an rel bawk.
October 19, 2010 ah khan Revenue Department -in NLUP hnuaia ram pek dan leh VC leh Office pawimawh hrang hrangten hma an lak dan tur ruahmanna fel tak siam a ni a.NLUP office atang pawhin NLUP hnuaia ram theh dan leh Revenue Dept.order kalpui dan tur order chhuahin an bawhzui bawk.Vawiin meeting ah hian thu pawimawh tak rel a ni.
1. VC ten Land Allotment an tihte felfai zawka kalpui turin VC tin hnenah Resolution bu leh ram tehna tur measuring tape pek nise.
2. VC te ram pekna reng reng hi VC Council meeting resolution leh a number leh ni leh thla fel taka record nise.
3.Revenue Dept.in Provisional Permit Form an siam hmang hian VC zawng zawngin NLUP benefeciary te tana ram pekna lehkha siam nise.
4. Revenue Dept.in terms & condition an lo siam hi zawm theuh ni bawk se.
5. VC te ram pekna lehkha hi November 30,2012 chhungin anmahni district theuhva DC office ah theh luh nise.
6. Thil kalpui dan tur in kawhmuhna training,District / Block tinah neih nise.DC office mi te bakah Revenue leh LAD Dept.aiawhte tel bawk nise.
7. Training - na atana senso te, resolution bu leh measuring tape te hi DC office kal tlangin NLUP atangin pek nise.
8. Ram ngaw reserve tur leh lui hnar humhalh tur ruahmanna hi December 2012 chhungin khaw tin ten tih fel lo tum se.
9. District Council area chhunga Detail Land Use Planning ruahmanna la siam fel loh leh kalpui dan tur hi November 2012 chhungin District Council hotute nene thukhawmin rel fel nise.
10. Ram ngaw reserve tur enfelna leh kalpui dan tur rel fel ngaite a hma thei ang bera rel fel nise tiin an rel bawk.
Hetianga thil kalpui anih chuan Mizoram leilung vawn leh enkawl dan tur thar duhawm tak NLUP avangin lo piang chhuak thuai tura beisei a ni.
