Pu Lal Thanzara, Parliamentary i/c PWD etc. chuan, Sawrkar laipuiin Scheme leh policy tamtak keimahni dawmkan nana a duan te hi tangkai theihtawpin i hmang ang u, a ti.

Bharat Nirman Public Information Campaign, vawiina Thingdawl Community Hall-a hmanpuiin khuallian Pu Lal Thanzara chuan India sawrkar flagship programme leh thingtlang miretheite hmasawn nana scheme te chhawrtu kan ni hi kan vanneihzia hria ila, heng sum leh paite hi tha takin i hmang ang u, a ti a. Kan hrisel nan te, tui thianghlim kan lo neih theihna tur leh Khaw tinin Eng kan neih theihna tura a thil ruahman tehi a ropui takzet a ni, a ti. Mizoram sawrkar chuan tunah hian kawng hrang hrangah mi rethei leh eizawnna kawnga rahbi tleu tawhte khai chhuak leh turin theihtawpin hma a la a. NLUP kalpui mek chu chhungkaw 45,000-in an dawn tur ang an dawng fel thawkhat tawh a. Chhungkaw 45,000 dang tuam leh turin tih chhoh leh mek a ni, a ti a. NLUP dawngtute hian kan thawh that phawt chuan kan ram siam tha a kan economic dinhmun siam thatu tur a ni a, rethei leh hausa inkar kakzau zel tur pawh hei hian a veng ang a, kan society alo nuam dawn a ni, a ti. Health care scheme pawh tunah hian mumal taka thlir nawnin hman a ni dawn a ni, Pu Lal Thanzara chuan a ti bawk.

Mi thenkhatin hnam thila inpuhmawhna thu phuh chhuaka rilru titho thei zawnga thu an sawi chu thil tul lo tak a ni, tiin Pu Lal Thanzara chuan Mizote hi Pathian-ah leh Kohhran-ah kan rinawm chhung chuan tuman min chimral lovang , a ti a ni.

Vawiina PIC Campaign hi Pi Lallianpuii, DIPRO in a kaihruai a. Pu Mangjangam Touthang IIS, chairman, Core Committee chuan pungkhawmte lawmna thu a sawi a ni. Hawnna inkhawm neih zawh hian khuallian chuan Deptt. hrang 20 chuang ina Exhibition an neihte a thlir kual a. Technical session chhawng hnih neih zui nghal a niin hetah hian Deptt. hrang hranga Central Scheme kalpui dan Deptt. miten an sawi a ni.

PIC hi vawiin khan Hortoki-ah pawh neih chhunzawmin Health Camp hlawhtling taka neih a ni a. Mi 226 lai Doctor thiamten an en a. Medical team tehi Dr. Lalramliana,dist. Medical Supdt. in a ho a ni. Naktuk khian PIC hi chhunzawm lehin Khamrang-ah Health Camp neih a ni dawn a ni.