NLUP hnuaia Sial leh Zobawng vulh thlangtu chhungkaw 1856 te tan District hrang hrang ah hma lak mek a ni a. Sial leh Zobawng vulh turte hian tum khatah ran 4 leina tur Rs.40,000/- an dawn hmangin an ran vulh tur te an lei khawm mek a. Champhai district ah chhungkaw 995 zinga 710 te chuan District officer te hriatpuiin Sial/Zobawng 1882 lai an lei khawm tawh a, chhungkaw 285 te chuan khaw dang atangin an ran lei tur te an chah mek bawk a ni.

Mizoram-a bawngsa kan ei tam zawk hi Myanmar leh phai atanga lak luh, bawng tar leh chhawr fe tawh te an ni tlangpui a. Sa-a Zoram intodelhna turin AH&Vety department chuan NLUP hnuaiah sial leh zobawng vulh punna tur ruahmanna hi siamin an tlatna tur hmun (Grazing Ground) hung nan Rs.700,00,000/- senna tur Detailed Project Report chu NEC ah a theh lut tawh a. Hei hi Mizoram sorkar ngaih pawimawh list (priority list) ah pawh dah a ni tawh nghe nghe a ni. Ran tlatna tur hmun te hi thirlena hung a remchan theih nan AH&Vety department chuan Sial leh Zobawng vulh thlangtu te chu a hlawpin, khaw khat khing phel phawk te ni thei se an duh a. Chu bakah chuan mi huan thlai an tih chhiat lohna tur hmun remchang ran vulhtu ten ruahman se an duh bawk a ni.