NLUP hnuaia bawngvulh thlangtu te tana AH&Vety department-in bawng chi tha leh hnute tui tam, Haryana atanga a chah lo thleng hmasa te chu vawiin khan Falkland Veng, World Bank Road-ah Chief Minister Pu Lal Thanhawla’n a dawngtute hnenah a hlan.

NLUP hnuaiah hian bawngvulh thlangtu chhungkaw 949 ten bawng 2 theuhva an chan turin AH&Vety department chuan bawng chi tha 1898 Haryana atangin a chah mek a. Kwality Dairy & Agro Sales, Haryana te nen indawrin bawng 1 chah thlen na man hi Rs.55,000/- zel a ni a.Tun tumah hian bawng 46 lo thleng hmasa in a dang enge maw zat kawng lakah an la thang mek a. Bawng te hi a rai lai an ni deuh vek a ni.

Chief MInister chuan thu sawiin Mizoram ah ramngaw a chereu nasat tawh em avangin tuihna leh lui te a kang chat mek a. Tuk tin feh chhuaka rim taka hna thawk tan pawh kham khawp thar a harsat tawh avangin Mizoram sorkar chuan loneitu miretheite leh kut hnathawktu ten hahdam leh hlawk zawka ei an zawn theihna turin NLUP ruahmanna a siam a. A thawh khatna ah chungkaw 45,000 tanpuina pe in a thawh hnihna ah chhungkaw 45,000 dang tanpuina pek leh mek an ni a. Nakum 2013 ah chuan chhungkaw 1,20,000 tuam chhuah vek tum a ni a, hemi atan hian sum pawh a awm sa vek a ni, a ti a. Kut hnathawktu ten lei rem an rah hma loh chuan Mizoram hi ram nuam a ni tak tak ngai lovang tiin Pu Lal Thanhawla chuan miretheite khai chhuahna tura Mizoram sorkar in NLUP a duan ah hian cheng nuai 1 aia tlem lovin mirethei te chu tanpuina pek a tiam a; a thutiam ah sorkar chu a hlawhtling tawh a. NLUP enkawltu line department te pawhin mirethei te chanai hi it lovin thahnem ngai takin NLUP ti hlawhtling turin hna an thawk mek a. Tanpuina dawngtu te rinawmna leh taimakna leh tih tak tak na ah NLUP hlawhtlinna zik tluak chu thui tak a innghat tawh a ni, a ti.

Chief Minister chuan bawngvulh lama hriatna zau tak lo nei tawh te thurawn atangin Haryana bawng te chu sik leh sa a inan loh avangin enkawl uluk an ngai hle dawn a ni, a ti a. NLUP hnuaia bawngvulh eizawnna hi a hlawhtlin ngei theih nan bawngvulh tute chu ngun taka vilpui turin department hotute a chah a ni. Chief Minister chuan vawiin ah vek Forest Research Centre Bethlehem Veng-ah hawn a ni tih sawiin NLUP hnuaia hmalakna pawimawh Hryana bawng chi tha sem nen vawiin hi Mizoram tan ni pawimawh a ni tiin a sawi bawk.

Bawng semna hun tawite neih hi AH&Vety Director Dr. L.B.Sailo in a kaihruai a. Assembly Speaker Pu R.Romawia, NLUP Changtu Minister Pu H.Liansailova, PHE Minister Pu S.Hiato te bakah bialtu MLA leh Law Commission Chairman ni bawk Pu R.Lalrinawma, MLA te leh NLUP Implementing Board hotute an tel a. Minister Pu H.Liansailova chuan hun hnung khar nan thu sawiin NLUP chu vote zawnna mai a ni lo, a ti a. Tanpuina dawngtu bawngvulhtu te chu NLUP hlawhtlin nana meichher chhitu an ni tiin theih tawp chhuaha NLUP hlawhtlin nana thawk turin a chah a ni.