Ni thum awh tur MHIP Sub-Headquarters Serchhip Conference vawi 7-na East Lungdar Community Hall ah neih mek niin, vawiin khan Home Minister Pu R.Lalzirliana chuan khuallian niin a hmanpui a, Pi Lalnipuii, Chairman, Mizoram Women Commission chu khualzahawm atan hman a ni.

Khuallian chuan MHIP member kalkhawmte chu inchhungkhura an mawhphurhna hrechiang tura chahin an tih hmasak tur an hriatchian a pawimawh thu a hrilh a, nupa inlungrual a pawimawhzia thu te leh nupuite tan an pasalte an hmangaih ang bawka an pasal chhungte an hmangaih tel ve a pawimawhzia sawiin inchhungkhur inremlohna tam tak hei hian a ti kiang thei a ni a ti bawk. Minister chuan mizo hmeichhiate chu rilru chak tak leh lehkha pawh thiam thei tak an ni tiin an thiamna te a taka chhawr theih tura an inzir a pawimawh a tih thu a sawi a, mipa te zahthiam a tul zia pawh sawilangin hetiang mi hi chu mipa te pawhin an zahlet ve ngei ngei thin a ni a ti bawk.

Minister hian East Lungdar Branch MHIP te hnenah mirethei te tanpuina atan an hman turin rangva bundle 5 a pe a, Serchhip Sub-Headquarters MHIP hnenah tanpuina tangka fai Rs. 5000 a pe bawk. Khualzahawm pawhin Mizo Customary Law anihna ang taka hman a tul tawhzia MHIP member te hrilhin hemi kawnga hmalakna ah rilru hmun khat pu a pen ho a ngaih thu a sawi bawk a, Mizo Customary Law kimchang ziahna bu chu MHIP Branch tin hnenah an lo zirchian ve turin a sem nghal bawk a ni.

Vawiin Member inkhawmpui hun hi Pi Saimawii Sailo, President, MHIP Sub-Headquarters Serchhip in a kaihruai a, programme benglut leh mit ti tlai tak tak entir a nih bakah, Sub-Headquarters MHIP member zinga tun hnaia VC member atana thlan tlin awm chhun Pi B.Lalthuami (Serchhip-IV) hnenah chawimawina thuziak an hlan bawk a ni.

MHIP Sub-Headquarters Serchhip Conference vawi 7-na hi March ni 14, 2012 atanga neih tan niin nimin (March ni 15, 2012) khan Palai rorel inkhawm an nei a hruaitu thar an thlang nghal bawk a ni. Khawmpui hi zanin (March ni 16, 2012) hian a tiak ang.