Kolasib District chhunga Zuk leh hmuam lama office fai leh thianghlim ber Minor Irrigation Office hnenah vawiin khan Zamzo Award hlan a ni a. DC Pi Niharika Rai IAS chuan Citation mawi tak a hlan a ni.

Kolasib District Coordinator, Mizoram State Tobacco Control Society buatsaihin Zamzo Award hlanna inkhawm hi vawiin khan DC Conference Hall-ah neih a ni a. MSTCS in Washington, USA atanga khawl an hawh hmanga office a mei khu tlem ber ber te hnenah Award hi sem a ni a. Pakhatna chu Minor Irrigation niin II- na lawman hi office pahnih PHE leh CMO office ten an dawng a. Pathumna chu DC office, DAO lah EE,Serlui Hydel Project Office ten an dawng a. An zavai hian citation DC kut atangin an dawng a ni.

Zamzo Award a hlan hmaa thu sawiin Pi Niharika Rai chuan, Tobacco kan dona hi rei tawh fu mahse a tha zawngin nghawng a nei chak lo hle a. Department thenkhat phei chuan kan ngai thupui lo hle nite pawhin a hriat a ni, a ti a. Kan taksa tana a pawizia hi chu kan sawi zing tawhin kan hre tam tawh hle a. Tunah chuan Anti Tobacco Squad te pawhin khauh zawka hma kan lak a ngai ta a ni, Pi Rai chuan a ti a. Kar leh mai atang khian Squad ten Market an fang ang a, Tobacco thil zawrha warning tarlan loh an zuar lui zel a nih chuan warning pek hnuah an bungraw man sak an la ni dawn a ni, a ti a. Department kalkhawm tepawh COPTA dan te ngai pawimawha zawm turin a chah nawn bawk a ni.

Zamzo Award hlanna inkhawm hi Pi Lallianpuii, DIPRO in a kaihruai a. Nl. Mary Lalthansangi Sailo, Dist. Coordinator, Mizoram State Tobacco Control Society chuan Power Point presentation pein Mizoram chhunga Vaihlo khuahkhirhna dan hman a nih hnua hmasawnna hrang hrangte a sawi a. Chhinchhiah danin mei zuk bansankawnga hmasawn chak ber Mamit a ni a, Champhaiin dawtin Kolasib chu pathumna a ni.

Dr. Lalramliana, District Medical Supdt. & member, Anti Tobacco Squad pawhin Power point presentation a pe bawk a. Zawhna leh chhanna hun hman zui a ni bawk a ni.