Chief Minister Pu Lal Thanhawla chuan vawiin khan Bethlehem Vengthlang-ah Advanced Research Centre for Bamboo & Rattan (ARCBR) a hawng.

Chief Minister chuan he bamboo research centre hmunhma leh a building cheibawl dan te chu tha hle a a hriat thu a sawi a. Mizoram chu hmun kilkhawra awm anih avangin hmasawnna ruhrel reng reng hi kan hmu mai ngailo a ni a ti a. Hetiang mau zirchianna hmun kan nei ta hi Mizoramin hmasawnna rahbi pawimawh tak kan chuangkai a ni a ti a. Ram pum huap zirna in tlemte kan neihte sawilangin, Central University pakhat, Vety college, NIT leh IIMC te an ni mai a, heng bakah hian central sorkarin sainik school dinna tur leh horticulture college la din tur an nih thute a sawi bawk.

Chief Minister chuan Mizoramah mau chi hrang tam tak a awm thu sawiin, hengte hi he research centre hian a tangkaipui ngei a beisei a ni a ti a.Mau lama mithiam leh tuimi, Dr.VK Bahuguna, Director General, Indian Council of Forestry Research & Education, Dehradun in phur taka he hun a rawn hmanpuinaah lawmthu sawiin, a enkawl zel naah tui pui chho a, research centre tha leh hmingthang anih ngei theih nan thlahthlam lo turin a chah a.Tualchhung mite tan an thawh theih awm hna siamsak turin a chah bawk a ni.

Hawnna inkhawmah hian Pu S.Hiato,Minister for Industries leh Dr VK Bahuguna te chu khualzahawm an ni a, NK Vasu, Director, Rain Forest Research Institute, Jorhat in inlawmna thuchah a sawi bawk a ni.

He Centre hi ni 29 November 2004 khan Union Minister of State for Environment & Forests in a lungphum alo phum tawh a. Tuna a awmna hmun hi tunhmaa sahuan hmun thin kha a ni. Research centre a nih angin a hmun ram luah hi a zau thawkhat viau a, office building leh chenna in tha tak tak sak bakah, laboratory te leh ruhrel tuldang siam nana senso pawh Rs.10 Crore vel hmanral a ni. Tunah hian Pi Imtienla AO, IFS chu Director a ni mek a, ani bakah hian a nghet a thawk mi 3 leh contract basis a thawk mi 9 an awm mek a ni.