Nimin (1.6.2016) chawhma dar 10 khan Kahrawt veng YMA Hall-ah Champhai District-a Agriculture Department hnuaia NLUP 3rd leh 4th Phase tanpuina, NLUP Implementing Board Chairman, Pu J.H. Rothuama MLA chuan a sem.

NLUP semna inkhawmah thu sawiin NLUP Implementing Board Chairman Pu J.H. Rothuama chuan NLUP chu Mizoram intodelhna tur hmanraw pawimawh tak, mi rethei leh harsa zawkten eizawnna bul an tan theihna tura leh kan lo neih dan thalo laite bansan a nih theih nana sawrkar hmalakna a ni, a ti a. NLUP hmalakna chu Mizoram University mithiamten an zirchian atanga a lan danin a hlawhtling hle a ni, a ti bawk. NIB Chairman chuan intodelh pawimawhna sawiin ram intodelh chu ram changkang leh zahawm an ni thin, a ti a. Mizoram sawrkarin NLUP a kalpui dan hi state dangte pawhin tha an tiin sawrkar laipuiah an dil ve mek a niin a sawi bawk. Mizorama vawkvulhtuten harsatna an tawh fo chhan chu Mizoramah vawk pul hri a chamban vang a ni tih sawiin, NIB Chairman chuan, “UN mithiamte nen a tihbo dan zawn mek a ni,” a ti bawk. NIB Chairman hian Champhai District-a Custom Hiring Centre sawm leh pakhatna a hman tur tractor a vailiam bawk.

NLUP sem inkhawm hi District Bawrsap Pu Vanlalngaihsaka, IAS chuan a kaihruai a. District Agriculture Officer Pu R.K. Nithanga chuan NLUP hnuaia Agriculture Department hmalakna hrang hrang a tarlang a. Champhai District chhungah chuan NLUP Phase 1 leh Phase 2 hnuaiah chhungkaw 2151 hnenah tanpuina pek tawh a ni a, Phase 3 leh Phase 4 hnuaiah hian chhungkaw 1125 hnenah tanpuina sum cheng nuai 114 sem tura ruahman niin Bank account nei chhungkaw 950-te chu an bank account-ah dahluh sak an ni tawh a, bank account nei ve lo te chu sum fai a pek an ni thung ang.