Nimin (1.6.2016) chawhnu dar 2 khan Ruantlang,Champhai, chuan an YMA Library-ah Model Village atana puan an nih lawmna ropui takin an buatsaih a. He hun hi Bialtu MLA, NLUP Implementing Board Chairman ni bawk Pu J.H. Rothuama chuan a hmanpui a, District Bawrhsap Pu Vanlalngaihsaka, IAS leh Champhai BDO Pi PC Zonuntluangi, MCS bakah district official dangten an tawiawm a ni.

Khuallian, Bialtu MLA Pu J.H. Rothuama, NIB Chairman, chuan Ruantlang mipuiten Model Village an nihna an ngaihlu thiam chu fakawm a tih thu a sawiin, “Model Village hian hamthatna a keng satliah lova, khawtlang mipui leh sawrkar tan thawh dun tur hna tam tak a chhawp zawk a ni,” a ti a. Khaw dangte entawn tlak, khaw thianghlim leh fai, hriselna leh zuk leh hmuam do kawngah pawh khawdang entawn tlak ni turin Ruantlang mipuite a sawm a. Model Village ni thei tur a khawtlang in lungrualna a pawimawh hmasak thu sawiin Khuallian chuan, “Khawtlang inlungrualna chuan khaw awhawm berah min hlangkai thei a ni,” a ti bawk.

Champhai District Bawrhsap Pu Vanlalngaihsaka, IAS pawhin Ruantlang mipuite inhuamna chu lawmawm a tih thu sawiin rilrua model village nih tum tlat turin kal khawmte a fuih a. Faina chung changa an hmalak tawh dan chu khawdang tan entawn tlak a nih thu leh faina mai bakah Model Village tehfung pawimawh dang, mipui zawng zawng ziak leh chhiar thiam tir te, naupang zawng zawng zirna school zawm tir te leh vaccine la thei zawng zawngten kim taka lak theih na tura tan lak bakah vaihlo laka khawchhung vawng fihlim tura tan lak te pawh ngaipawimawh chhunzawm zel turin a chah bawk.

Model Village lawmna inkhawm hi Ruantlang VCP K.T. Vanlalchuana’n a kaihruai a. VC Secretary Pu M.S. Dawngzela leh tlawmngaipawl hrang hrang aiawhten Model Village atana an hmalak tawhnate tarlangin an harsatna te bialtu MLA hnenah an thlen bawk.Model Village lawmna inkhawm hi VC Vice President Pu C. Lalrivunga’n lawmthu sawiin a khar a ni.

Model Village lawmna neih zawh hian NIB Chairman, Pu J.H. Rothuama, MLA chuan Ruantlang Branch YMA in Zokhua an siam te, Mualveng Branch YMA Hall sak mek te leh Lersia Field chung leimin te a tlawh bawk.