Vawiin tlai dar 5:30 khan India ram palai Pi B.B.Harrison, IFS, Indian Ambassador to Sweden, Pu Lalduhthlana Ralte, IFS, Indian Ambassador to Philippines leh Pu Vanlalhuma, IFS, Indian High Commissioner to Malawi te chuan Mizoram Larsap Lt. Gen. Nirbhay Sharma (retd.) chu a chenna Raj Bhavanah an tlawh a inkawmhona hun tha tak an hmang.

 

Larsap chuan Indian Army a kum 40 a thawh chhungin India hmarchhak State hrang hranga a awm tawh thu leh Mizoram erawh Larsap anih hnu chauh a a tlawh thu sawiin Mizoram chu ziak leh chhiar thiam tamna an nih bakah ram ramuang an nih vangin hmabak eng tak leh theihna sang tak nei a ni a ti a, Mizorama a awm chu vannei a in tihzia leh Mizote pawhin an vanneihzia hria a an theihna tak tak haichhuak tura nasa lehzuala tan an lak a pawimawh a tih thu a sawi.

 

Governor chuan Mizo thalaite chu theihna sang tak nei an ni tih an inhre tawk lova a hriat thu sawiin Sawrkar hna in eizawnna a daih sen loh avangin mahni kut leh ke a ding thei tura rilru an siam ngam a pawimawh hle a ni tiin Skill Development  lama hmasawn tura nasa lehzuala tan lak a pawimawh hmasa a a hriat thu a sawi. Mizoram hmasawnna tur chuan Sawrkar mai bakah kohhran leh Tlawmngai pawl te an pawimawh hle tih sawiin mipuite rilru sukthlek kaihruai dik turin an pawimawh hle a ni a ti a, mizote chu hriselna kawngah hmasawn tura tan an lak a ngaia a hriat thu sawiin kan khawsak phung leh kan ei leh in thlengin zirchiana her rem te pawh a tul dawn a a hriat thu a sawi bawk. Mizoram chu khualzin hip turin potential nei tha tak ani tiin abik takin Mizoram sik leh sa hi a that em avangin health-related tourism atan phei chuan hmun tha tak a ni a ti a, hemi tihlawhtling tur hi chuan pawn lam atanga investment rawn ti tur chah luh a ngai dawn a a lan thu a sawi bawk.

 

B.B.Harrison, IFS, Indian Ambassador to Sweden chuan Mizoram sik leh sa leh ram ngaw tha tak mai te chu holiday hmanna atana duhthusam ani a ti a, inkalpawhna kawng leh infrastructure erawh tun aia changtlung deuh hlek a siam anih chuan nasa zawkin khualzin pawh a hip a rin thu a sawi a, Mizoram awmna hmun chu India ram himna leh sumdawnna atan pawh hmun pawimawh tak anih avangin ngaihpawimawh a hlawh chho reng tawh dawn ani a ti a, amah ngei pawhin Mizorama a cham chhungin hlawk zawk leh awmze nei zawka Mizoram leh Sweden an inchhawr tangkai tawn theih dan tur ngaihtuah a tum thu sawiin India ram nen insumdawn tawn kawngah Sweden chuan nasa taka tan lak thar a tum a, India ram chu saptawng hmang nal thei tamna hmun anih avangin an Company lian tak tak te pawhin inbun an duh a, hnathawktu pawh India ram mi leh sa ngei chhawr tam an duh dawn a, Mizo thalaite leh Mizoram ngei pawhin a chhawr tangkai ve ngei a beisei thu a sawi bawk.

 

Pu Lalduhthlana Ralte, IFS, Indian Ambassador to Philippines pawhin Kolodyne Multi-Modal Transit Transport Project a hlawhtlin hunah chuan Mizoramin a hlawkpui hle dawn anin tiin Sittwe lawngchawlh hmun kaltlangin South-East Asia thlengin kan inkalpawh thei dawn a, a hlawkna tel thei tura Mizoram mipuite leh thalaite tun atanga kan inbuatsaih a ngai a kaihhruaina tha kan mamawh a ni a ti a, Pu  Vanlalhuma, IFS, Indian High Commissioner to Malawi pawhin he project hi a hlawhtlin hun ngahhlelhawm a tih thu sawiin kum 10 kal ta a Mizorama hna thawka a rawn chuan chhuah laia bul tan anih thu leh a tirah a project cost 95 % India sawrkarin a tum ang a, 5 % Myanmar sawrkarin a tum tura inremsiam anih laia Myanmar Sawrkar a inhnuhdawh leh tak si avanga a project pumpui India sawrkarin a enkawl tak thu te a sawi a, tuna a hnathawhna hmun Malawi ram leh India ram insumdawntawnna tur leh inlaichinna atana pawimawh chi hrang hrangte a sawi bawk.

 

Larsap chuan India ram palai pawimawh tak tak ten Mizoram an tlawh leh an zinga mi pahnih chu Mizo ngei mai an ni chu lawmawm a tih thu sawiin an kalna apiangah Mizoram nawm zia leh hmabak en zia sawi uar a, mithiam leh mipawimawh tak takte Mizoram tlawh tura sawm lut thin tura chahin chu chuan nasa takin Mizoram hmasawnna kawngah a puih tel ngei a beisei thu a sawi a, heng India ram palaite hnenah hian ngaihhruina a hlan theuh bawk a ni.

 

India ram palaite hian naktuk hian Home Minister Pu R. Lalzirliana, Industry leh Trade & Commerce Minister Pu H. Rohluna leh Mizoram Chief Secretary Pu Lalmalsawma, IAS te an pisa theuh ah an kawm ang a, tlai ah Pu Lal Dingliana, IFS(retd) Chief Information Commissioner an kawm ang a, zanah Mizoram Chief Minister Pu Lal Thanhawla a chenna In ah kawmin Chief  Minister in zanriah a buatsaih sak chu an kil nghal ang.