NLUP hmanga  hlawhtlinna hrang hrangte phochhuah leh zawrhna hun NLUP Fair-cum- Exibition-2018 chu vawiin khan Serchhip District tan Serchhip Town Hall-ah neih a ni. Serchhip NLUP Kûtpui hawnna inkhawmah hian Chief Minister Pu Lal Thanhawla chu khuallian niin a hawng. He hunah hian Pi Vanlalawmpuii Chawngthu, Minister of Cooperation, Fisheries, Sericulture chu khualzahawm a ni. 

Chief Minister Pu Lal Thanhawla chuan mamawhtute hnenah tanpuina sawrkarin a sem a, mi vanduai fal tlemte tih loh ah chuan a dawngtute zinga mi taima leh rinawm, thahnemngai taka thawktu chuan NLUP an hlawhtlin pui zel a ni, a ti a. Vawiin NLUP Kûtpui neih a ni thei pawh chu beneficiary taima leh tumruhte hlawhtlinna tichiangtu a nih thu a sawi. CM chuan kuthnathawktute, rambuai avanga eizawnna mumal nei lova hun rei tak an awm hnuah leirem an rah leh theihna tura NLUP duan a nih chhoh dan sawiin, NLUP chu a tir atangin sawrkar hnathawk leh sumdawng hausate tan nilovin mirethei, khawsak harsa, pachhia leh hmeithaite tanpuina leh leirem an rah theihna tur atana ruahman a nih thu a sawi a. Kuthnathawktute chawikanna tur lam hawi leh mil zawng hmalakna te chhunzawm zel a nih tur thu a sawi bawk.

Chief Minister chuan NLUP kalpui a nih atanga kum 7 kum 8 a lo tlin khan India ramah Mizoram chu state thang tha ber 4 zingah telin, NITI Aayog in tehnaah Mizoram GSDP chu a sang tha hle tih leh NLUP hmalakna chu Mizoram hmasawnna atana thawhhlawk ber pakhat a nih thu a sawi a. Ministry of Finance chhutlawk dan chuan Mizoram GSDP pun lehna tur chu digit-mal ni tawh lo in digit hnih (double digit) a ni chho tura ngaih a nih tur thu te, Mizoram Per Capita Income chu India ram pum huap aiin a San zawk thu leh chawkhapkhawm hmulo tlemna ber state a nihna te chu lawmawm a tih thu a sawi a. NLUP an hmelhriat avanga UNO hnuaia Agency te nen Mizoram sawrkarin thawhhona a  neih kaltlangin hmasawnna hrang hrang kalpui mek a nih thu te, University Of Minnesota pawhin NLUP chu tha an tih em avangin Mizoram sawrkar sawm pawh ni loin rawn telve dilin, Mizoram University nen pawh inremna thuthlung an ziah thu leh chung zawng zawng chuan Mizoram tana tangkai tur rah tha a chhuah zel tur thu a sawi a ni.

CM Pu Lal Thanhawla chuan India ramah dinhmun sang tak leh state hmasawn a kan awm theihna chu ram mipui - kuthnathawktute leh sawrkar hnathawkte tanlakna a nih thu sawiin lawmthu a sawi a. Hun lo kal zel turah tun aia hlawhtlinna nasa zawk kan neih kan duh a, chumi atan chuan theihtawp kan chhuah zel dawn a ni, a ti. NLUP Implementing Board a thawktute, Line Department-te leh DC leh a thawhpuite bakah beneficiary te thawhrimna zarah Kût hlawhtling tak bautsiah a ni thei chu lawmawm tiin, ram hmasawnna atan neitu rilru pu chunga sawrkar hmalakna tawiawm zel turin kalkhawmte chu Chief Minister chuan a sawm bawk a ni.

 

Khualzahawm Minister Pi Vanlalawmpuii Chawngthu chuan kuthnathawktute chu ram hmasawnna atan an pawimawh thu leh, sawrkar pawhin kawng hrang hranga an hmakhua a ngaihtuah thin thu a sawi a. Sawrkar hmalakna hrang hrangte hlawhtlinna chu a thawktute mai bakah  tawiawmtu mipuiah thui tak a innghat a, NLUP kalpui a nih hma leh kalpui a nih hnu chuan Mizoram economy in hma a sawn zia en chuan a dawngtute tawiawmna a that zia a lantir tel a ni, a ti a. NLUP Kûtpui a beneficiary ten an hlawhtlinna rah an phochhuak thei chu lawmawm tiin, an thawhrimna leh rinawmna chu chhunzawm zel turin beneficiary kalkhawmte chu a chah a. NLUP beneficiary-te chuan an tanpuina dawn an hman that leh thatlohna avanga malsawmna an dawn leh dawn loh chu anmahni kutah a innghat a ni tiin Cooperation Minister chuan beneficiary-te rinawm leh a nih dan tur dik hmanga tanpuina hmang thin tura hrilh an lo nih tawh thinna chu vawng reng turin a chah a. Hlawhtlinna hmutu chu sawrkar nilovin kuthnathawktute an nih thu a sawiin, kut hlawhtling tak hman a nih a duhsak thu a sawi bawk.

Pu P.L. Thanga, Member Secretary, SPB & Vice Chairman, NIB chuan thu sawi bawkin, miretheite leirem rah vena tur a duan leh thing leh mau, ramngaw leh nungchate humhalhna tura duan a ni a ti a. Thang leh thar, Mizoram luah chho zel turte tana ram tha leh nuam siam tumna, Mizoram dinthar tumna a nih thu a sawi. NLUP kalpui a nih atangin Mizoram chuan state tharchhuah atanga ei leh bar hmasawnna tehna ah kum nga chhung India average chu a khum thu a tarlangin, NLUP chu a huam a zau in chutihlai chuan he programme hnuaia hmalakna hrang hrangte chuan rah tha tak tak, ram pawn atanga an rawn ngaihven zui leh entawntlak a chhuah zel a ni, NIB Chairman chuan a ti.

Chief Minister Pu Lal Thanhawla chuan Specially Abled zirlai Zosangliani, Thenzawl hnenah kumin HSLC exam a pass lawmpui nan an chhungkaw inchawmna turin CM's Special Scheme hnuaiah Autorickshaw a pe a. Special Scheme hnuaiah hian Serchhip Cluster chhunga mi harsa zual NLUP dawnglo mi chhumchhiate tanpui nan chhungkaw 156 hnenah cheng 20,000 theuh a hlan nghal bawk. Chief Minister hian Serchhip  Cluster chhunga Commerce & Industries Department hnuaia NLUP Beneficiary mi 44 hnenah tanpuina 3rd leh 4th Phase a installment hnuhnung ber la hmulo te hnenah Rs. 90,000 theuh a sem bawk a ni.

Vawiina Serchhip NLUP Kutpui hawnna inkhawm hi Serchhip District Bawrhsap Pi Sangchin Chinzah chuan a kaihruai a, Pu Chuauhnuna, Addl. DC, Serchhip chuan lawmthu sawiin hun a khar a ni. Kût hian ni hnih chhung a awh dawn a ni.

NLUP Kutpuiah hian Line Department hrang hrangten Stall hawngin, Kûtpui pual hian Line Department hrang hrang hnuaia NLUP Beneficiary-te chuan an thil thar leh an thil siamchhuah te man tlawm zawkin an hralhchhuak a ni. I&PR Department chuan stall siam  bawkin NLUP hlawhtlinna pholanna Photo Exibition leh Video Show neih a ni bawk a. NLUP Kutpui hian hlut a hlawhin tlawhtu pawh an thahnem hle a ni.