Vawiin khan Sports & Youth Services Minister leh Mizoram State Sports Council (MSSC) President ni bawk Pu Zodintluanga kaihruaina hnuaiah MSSC General Body meeting Conference Hall, Hawla Indoor Stadium-ah neih a ni.
Minister Pu Zodintluanga chuan MSSC memberte lawmna thu a sawi a. Agenda chu ngun taka ngaihtuahin, inhawng taka an ngaihdante sawi turin a sawm a. MSSC Secretary Pu C.Laltlanthanga chuan kum kalta chhunga MSSC hmalakna hrang hrang leh hmachhawpte a tarlang tel a ni. General Body Meeting-ah hian MSSC Annual Programme 2018-2019 chhawpchhuah niin sawiho a ni a. Sports Association tana reserve fund chungchang leh Executive Committee in a lo pawm tawh angin Mizoram Indigenous Games Association chungchang rel a ni bawk.
Kum 2017-2018 chhung khan MSSC chuan hmasawnna ruhrel dinin hmalakna tam tak a nei a, Outdoor Artificial Climbing Wall (Hawla Indoor Stadium & LDSC Gound-II, Lunglei), Multipurpose Indoor Hall (Saizakawn, Lunglei), Sports Centre (Phulpui), Multi Sports Centre for Northern Region (Darlawn) te chu mipui hman theihin hawn an ni a. Hna kalpui mek thenkhatte chu Hachhek area-a Sports Infrastructure din te, Aizawl Electric Venga Indoor Stadium sak te, Joint YMA Field Vaivakawn-a Multipurpose Sports Complex leh Sihphir-a Multipurpose Hall sak te, artificial football turf Saitual leh Hnahthiala phah te an ni. Kum 2017-2018 chhung khan boxing, football, hockey, sepaktakraw, table tennis, weightlifting, motor sports ah medal 252 Mizoram aiawha kal ten an la a, kum 2018-2019 (May thla thleng) hian medal 18 an la tawh a ni.
Vawiin meeting-ah hian MSSC Executive Committee member leh Sports Association hotute mi 36 an tel a. Meeting hi entertainment session in a zui dawn a ni.
