Ni li chhung awh NLUP Kutpui hmasa ber chu vawiin khan Assembly Annexe Building Conference Hall-ah Home Minister Pu R.Lalzirliana'n a khar. NLUP Kutpui kharna inkhawm hi I&PR Minister Pu Lal Thanzara chuan kaihruaiin, NLUP Nodal Minister Pu KS Thanga, NIB Chairman Pu JH Rothuama, Tourism Minister Pu John Rotluangliana leh Vety Minister Pu C. Ngunlianchunga te he hunah hian an tel bawk a ni.

Khuallian Home Minister chuan NLUP Kutpui a hlawhtlin theihna atana a buaipuitute leh stall nghak tute bakah kut hlutpuitu mipuite chungah lawmthu a sawi a. NLUP hlawhtlinna rah zingah Mizorama mimal tinte sum deh chhuah (Per Capita Income) chu Rs.51,000 atangin a hnu kum riat ralah 2016-17 ah chuan Rs. 1,27,107 ah a lo pun takah te, kum 2012-13 atangin kum 5 chhung 2016-17 thleng a India GDP chu Mizoram GSDP in a khum dan ah te, United Nations Agency te, ram dang University te leh company lian tak tak ten NLUP an hmelhriat avanga Mizoram nen thawhhona tha tak neih phah a nih danah te NLUP chuan direct beneficiary te tan mai bakah Mizoram pum tan hamthatna a thlen a tih theih thu a sawi a. Pu R. Lalzirliana chuan heng thawhhona atang hian UN chuan Global Environment Facility (GEF) project hmu tura India state panga zingah Mizoram chu telh a nih ve thu te, UN Green Climate Fund atanga tanpuina pek remtih a nih thu te, CDAR Complex Tuirial ah Pack House Project, Agriculture and Processed Food Export Development Authority (APEDA) kaltlanga thawh mek a nih thu te a tarlang a. NLUP thil tum zing ami ramngaw siam that, nungcha humhalh leh tuikhur hnar tih nun thar lehna te chu khawvel pawhin a ngaihpawimawh leh hemi kawnga hmalakna pawhin awmzia a neih thui hle thu sawiin, chhungkaw eizawnna atana a tangkaina hrang hrang bakah Mizoram siam that lehna NLUP thiltum tam takte chu bansan theih a nih loh avangin NLUP chu chhunzawm zel a tul thu a sawi a. Home Minister chuan chhungkaw tam tak eizawnna kawnga bul an tanna NLUP hmanga hmalakna hi mipuite programme, ram hmasawnna hmanrua hlawhtling ber te zing ami a nih ta hi a lawmawm hle a ni, a ti.

Thusawitu dang NLUP Nodal Minister Pu KS Thanga chuan NLUP Kutpui hmasa ber hlawhtling taka khar theih a ni chu lawmawm a tih thu leh, Line Department leh beneficiary te bakah kut hlutpuitu mipui zawng zawng chungah lawmthu a sawi a. NLUP tanpuina dawng zingah hlawhtling tam tak, an kutchhuak te Mizoram chhung mai nilo state pawn leh ram pawn thlenga hralh chhuak an awm chu lawmawm a tih thu leh, heng mite hian taimakna leh remhriatna tha tak an nei tih a lan chian mai bakah midangte tan entawntlak an nih thu a sawi a ni. NLUP Nodal Minister chuan NLUP hmalaknain a dawng tlak leh mamawha a hriatte chu a khuh that hle nia a lan thu sawiin, beneficiary te mai bakah Mizoram pum tan programme pawimawh a nih thu a sawi bawk.

Vawiin inkhawmah hian NLUP Kutpui neih chhunga stall siamtute kawng hrang hranga Award Committee ten an endik hnuah Department leh Beneficiary zinga titha zualte hnenah lawmman sem a ni a. Beneficiary zingah lawmman pakhatna dawngtu chu C. Zohmangaiha (Blacksmithy) a ni a, pahnihna chu Lalsangzuali (Handloom) niin, pathumna dinhmun hi LR Hood and Seat Works leh C. Lalvena (Pickle Making) ten an intawm a ni. Anni bakah hian Lalremthanga (Pineapple, N. Chalrang), Baktawng Aloe Vera, Lalzui Research Foundation leh Hnam Chhantu Pawl ten Consolation Prize an dawng bawk. Department zingah chuan lawmman pakhatna dawngtu chu Commerce & Industries Dept. a ni a, Horticulture Dept. in pahnihna la in, AH&Very Dept. leh Sericulture Dept. ten lawmman pathumna an la ve ve a. Line Department dangin Consolation Prize an dawng a ni. Lawmman pakhatna hian citation leh pawisafai Rs. 25,000 pahnihna in citation leh pawisafai Rs. 20,000 leh pathumna in citation leh pawisafai Rs. 15,000 a keng a, consolation prize hian citation leh Rs. 5,000 theuh a keng tel bawk a ni. Kut hawn ni 6.3.2018 atanga nimin, 8.3.2018 thleng khan stall hrang hrang (Food Stall tiam loh in) an inhralhna sum lakluh belhkhawm chu Rs. 48,06,681 (Day 1 ah Rs.10,86,797; Day 2 ah Rs. 17,16,443 leh Day 3 ah Rs. 20,03,441).

NLUP Kutpui-ah hian Line Department 10 atangin a vaiin stall 75 hawn a ni a: Agriculture Department atangin stall 18, Horticulture Department atangin stall 12, AH&Vety Department atangin stall 4, Commerce & Industries atangin stall 18, UD&PA Department atangin stall 9, Soil Department atangin stall 1, Fisheries Department atangin stall 4, Sericulture Department atangin stall 4, Environment, Forest & Climate Change Department atangin stall 2 leh Transport Department atangin stall 3 siam a ni. Heng bakah hian NLUP partners engemawzah ten stall an hawng bawk a, Chung zingah chuan MEFCOF, MIFCO, MULCO, Hnam Chhantu Pawl leh adangte an tel a. Stall hawn zat zawng zawng hi 95 a ni.

NLUP Kutpui kharna inkhawmah hian beneficiary te bakah Line Department bakah sawrkar department dangte leh University leh Bank atang ten an hotute leh thawktute an kal khawm a. Beneficiary atang tein leh NLUP Partner-te atangin thusawi ngaihthlak a ni a. NIB Chairman Pu JH Rothuama chuan lawmthu sawiin hun a khar a ni.