Vawiin chawhnu khan Lunglei District Additional DC Pu Benjamin Lalzama kaihhruaiin a office chamber-ah Mizoram Youth Commission kaltlanga IIT-JEE leh NEET Coaching Centre Lunglei-a hawn tur chungchang sawho turin meeting neih a ni. Meeting-ah hian Lunglei khawpui chhunga Higher Secondary School Principal te, College Principal-te, MSU aiawhte leh MYC hotute an tel a ni.

Pu Benjamin Lalzama chuan MYC-in Mizo thalaite hmasawnna atan chak takin hma a la zel a, IIT-JEE leh NEET Coaching Centre Lunglei chu Lunglei District chauh nilovin Lawngtlai District leh Siaha District mipuite tan thu lawmawm tak a ni, a ti a. He Centre thil tumte ti hlawthling turin kan zavaiin tan kan lak a tul a ni tiin Zirna In hrang hrang hotute leh zirlai pawl aiawh kalkhawmte chu thawhho puiah a sawm.

Pu Lalsawmzuala, Under Secretary, MYC chuan Lungleia Coaching Centre din tura an inpuahchahna kal mek te sawina hun a hmang a. He Coaching Centre hi Very-small-aperture terminal (VSAT) Satellite hmangin Alternative Learning Systems (ALS) Delhi Online class neih thin a ni ang. March ni 28, 2018 ah class tan hman turin ruahmanna siam mek a ni bawk.

Committee chuan Coaching Centre classroom hi Lunglei Government Higher Secondary School ah neih ni se tih a rel a. Hawnna inkhawm March thla chhungin buatsaih ni se tih Committee chuan a rel bawk.