Mizoram PWD chuan thuchhuah siamin National Highway siamthat hna an thawh mek chu tluangtakin an kalpui zel a. A hnuai ami ang hian an hmalakna te an tarlang -

NH-6: Seling-Keifang black-top thuam that hna chu a kal mek zel a. Kumin ruah sur tawp hnuah Km 5.500 zawh tawh a niin, chak taka thawh zel a ni a. District thuneituten motor lian kaldan an relfel hnuah phei chuan chak zawka thawh theih beisei a ni . He kar kawng Km 35 a thui atangin tun thlenga zawh tawh chu Km 19.500 a ni. Kawlkulh-Khawzawl Km 30 a thui hna pawh chhunzawm a niin, khuar hnawh hna thawh sa fura chhe leh chu siamthat mek a ni a. He kawng atana alkatra chhuanna khawl thar bun chu zawh tep niin, December kar 2-na atang chuan alkatra hmanga hnathawh tan theih tawh beisei a ni. 

NH-44A: Mamit-R. Langkaih inkarah fur zawh hnuah kawng chhuat phah hnuaiber (GSB) Km.2.00 leh a chunga phah thuah (WBM base course) Km chanve a thui phah tawh niin, chhunzawm zel a ni a. Mamit bypass Km. 3.00 chuang hret blacktop zawh tawh a ni bawk. Tut lui - Mamit kawng thar sial hna pawh a kal zel a, Km 18 a thui atangin Km. 5.00 vel sial zovin, zo chiah lova dah mek Km 3 chuang a awm bawk a, sial chhunzawm zel a ni. Tut lui-Dialdawk lui inkar Km. 32.500 a thuiah Km. 1.00 laih zawh loh niin, Km. 25 black-top zawh tawh a ni a, hei hian fur hnua a zawh Km 2 a huam tel a, chak taka thawh chhunzawm zel a ni. Rockfall area bypass,Lengte peng atanga Dialdawk kawng thar pawh Contractor lak thar chuan chak takin a sial mek zel bawk .Airport panna Tlawng thir lei pawh tuna 20 MT phur kal thei hi 40MT thleng phur pawh kal theih turin tihchak hna thawh tan mek a ni bawk. 

NH-54: Lailapur-Bilkhawthlir thuam that hna thawh mek a ni a. Kawnpui – Khamrang - Buichali kawng chhe nasa pawh siam that mek zel a ni a. Thuampui-Tuirial kawng siamthat hna chu, Bawngkawn-Zuangtui peng inkar SIPMIU-in pipe an phum avangin, Pushpak Camp peng atanga tanin Zemabawk field bul thleng zovin, a bak kawng chanve a zauvin forest check gate thleng zawh tawh a ni bawk a. 26.11.2017(Sunday) atang khan Bawngkawn - Thuampui inkar thawh leh mek a ni bawk. Serchhip-Hrangchalkawn-Lawngtlai black-top siamthat hna pawh Christmas hmain zawh vek turn a ni. 

NH-302: Lunglei-Tlabung kawng chei that hna pawh Contractor 4-in an thawk mek a, alkatra hmangin hna thawk hrih lo mahse motor chitin kal theiha siam a ni. 

Kolasib-Bairabi kawng pawh theih anga siamthat chhunzawm zel niin, motor eng chi tan pawh harsa lem lova kal theih reng a ni. 

Serkhan-Bagha NEC road chu engemaw harsatna avangin Km khat tlinglo deuh laih zawh loh awmin, kawng chhuat phah hna thawh chhunzawm a ni leh tawh a. Fur hnuah Km 9 blacktop zawh tawh niin, chak taka chhunzawm zel a ni.