Vawiin khan Department of Arts & Culture, Government of Mizoram leh Raja Rammohan Roy Library Foundation, Kolkata, Ministry of Culture, Government. Of India buatsaihin Arts & Culture Auditorium, Lunglei ah Library Awareness Campaign neih a ni a, Pu K.Lalruala, Deputy. Director , Arts & Culture Department chuan khuallian ni in a hmanpui.

Library Awareness Campaign hi Pu K Lalramliana, State Librarian, Mizoram State Library in kaihruaiin Khuallian Pu K. Lalruala chuan Mizoram ah hian Public Library, State dangin an neih loh kan nei a, amaherawh chu mipuiten kan hmang tangkai tawklo lo hle a ni a ti. Mahni veng theuha Public Library leh Government Recognised Rural Library enkawltute hi khawtlang hmasawnna ah mawhphurtu lian tak an ni a, naupang leh thalaite tan Library hi hriatna hmunpuiah kan siam thei a, chumi ti hlawhtling tur erawh chuan khawtlang hruaitute leh Library enkawltu ten nasa taka hma kan lak a tul a ni tiin hmasawnna kal zel ah hian kan hriatna leh finna bulpui ber chu Library hi a ni a ti. Library chu mimal nun a tha zawng a siam tha thei tu, ram hmasawnna leh changkang a siam thei tu a ni tih hre thar tur leh kan veng, kan khua ti nuam tu leh ti mawitu a ni tih hre theuh turin kalkhawm te a chah.

Dr.C.Lawmzuala, Central Library MZU in Library hlutna leh hman tangkai dan chungchang  zirtirna a nei a. Mizoram ah hian State Central Library 1, District. Library  5, Govt. Recognised Rural Library 485 a awm a ni. Vawiin a Library Awareness Campaign neihna ah hian sawihona neih a nih hnu in zawhna leh chhanna hun hman a ni bawk.