Vawiin khan Lunglei District-a a vawikhatna atan Mizoram State Legal Service Authority leh Lunglei District Legal Service Authority tangkawp buatsaihin Legal Services Camp Saikuti Hall ah neih a ni. Pu R. Thanga, District & Sessions Judge Lunglei chu khuallian niin Pu Vanlalenmawia, Member Secretary, Mizoram State Legal Service Authority chu khualzahawm a ni.

Legal Services Camp hawnna inkhawm hi Pi Julie. Lalrinzami, Secretary District Legal Services Authority Lunglei in a kaihruai a, khuallian Pu R.Thanga District & Session Judge Lunglei District chuan Key Note Address sawiin Lungleia a vawikhatna atana Legal Services Camp buatsaih theih a ni chu lawmawm a tih thu leh mipui ten hman tangkai nachang hria se a duh thu a sawi a, Legal Services Camp in a tum ber chu tute pawhin kan dikna leh chanvo kan hriat a harsatna leh buaina kan neih hunah pawh a thlenna tur diktak kan hriat theih nana buatsaih a ni tiin, Sawrkar Department te pawhin an mahni Department ah theuh thubuai an nei thei veka chumi kawnga in remsiam theih dan leh thubuai kalpui dan kawngah hmasawn nan kan hman theih nan buatsaih a ni a ti. Pu R.Thanga chuan thubuai kan neih hmain Lok Adalat ah inremsiam theih a ni tih te pawh kan hriat a pawimawh ani tiin, Lunglei District Legal Servies Authority chuan theihtawp a hma an lak thu leh Mizoram Victims of Crime Compensation Scheme hnuaiah zangnadawman pek chhuah thin a nih thu a tarlang a.

He Camp hawngtu Khualzahawm Pu Vanlalenmawia Member Secretary State Legal Services Authority pawhin thu sawiin, mipuite hian Welfare Scheme hrang hrang hriat hi an duh a, hetiang a nih avang hian Department hrang hrang ten mipuite tana Scheme an nei leh an kalpui dan chungchang hriat chianna hun atan Legal Services Camp chu buatsaih a nih thu sawiin, Mizoram chhung District hrang hranga an buatsaih tawhna ah mipui ten an chhawr tangkai hle a ni a ti. Pu Vanlalenmawia chuan kawng hrang hranga vanduaina tawktu te hnenah State Legal Services Authority chuan zangnadawmna an pek chhuah thin thu a sawi a. Dan lamah Zirlaite an hriatna tizau tur leh mipuite an tanpui theihna turin Lungleia Zirna In Panga – Govt JB College, Leitlangpui Higher Secondary School, Govt Hnahthial College, Lunglei Government College leh HATIM ah te Legal Literacy Club din a nih thu a sawi bawk.

Woman of the Year Chawimawina  hlanna hun hman niin Pu Vanlalenmawia Member Secretary State Legal Services Authority chuan  Woman of the Year a thlanchhuah Dr H. Lalnunmawii, Bazar Veng, Lunglei hnenah Citation a hlan a ni.

He hunah hian Saikuti Hall Ground Floor-ah Lungleia Sawrkar Department  hrang hrang te, Bank hrang hrang, Telecom lam company te, leh Assam Rifles ten stall siamin an hnathawhte an pho chhuak a, mipuiin hriat duh an neih te an zawtfiah hlawm a ni. Hemi bakah hian Department thenkhat ten an thil siam hrang hrang an zuar a,. Heng bakah hian Gas Agency Stall, Free Medical Clinic, Free Dental Clinic, Ramhmul Damdawi Stall leh Lunglei District Jail tang te thilsiam zawrhna stall te neih a ni bawk. Legal Service Camp ah hian mipui thahnem tak kalkhawmin an hlut hle a ni.