Vawiin khan NLUP-NEDP Convergence hnuaia hamthatna dawngtu   te’n Bank kaltlanga tanpuina an dawn theih leh theih loh dante sawihona hun Champhai DC Dr. Naveen Aggarwal, IAS hovin DC Conference Hall, Keifangtlangah neih a ni. He hunah hian Line Department hrang hranga hotute leh Bank lam hotute an tel a ni.

Champhai DC chuan Line Department hrang hrangte chu remchan dan ang zela Beneficiary-te technical training mumal tak pe vek tur leh chumi hnuah tanpuina First instalment pe chhuak turin a ti a. Second Instalment pawh an thawh that dan VLNC te nena thlithlaia, an thawh that chauha pechhuak thin turin a chah a ni. Tin, heng bakah hian Beneficiary dik tak leh dawng tur hnena tanpuina a thlen ngeih theihna turin Training lai ngeia Adhaar, EPIC Card, Passbook leh Bank Account te felfai taka endik leh vek tura tiin, Bank Account nei remchanglo an awm pawhin  khawtlang hruaitu VC te atanga finfiah zel thin turin a chah nghal bawk a ni.

NLUP Implementing Board (NIB) duh dan ang chuan Beneficiary-te hnenah tanpuina sum Bank kaltlanga pekchhuah vek tur a ni a, hemi chungchang inrawnkhawmna meeting-ah hian Champhai District chhunga sawrkar Department NLUP-NEDP Convergence kalpuitute hnen atangin tanpuina an semchhuah tawh dante ngaihthlak a ni a. A tlangpuiin tanpuina sumte hi Direct Benefit Tranfer hmanga Beneficiary-te Bank Account theuhah thunluh thin a ni. Harsatna engemaw avanga Bank Account siam lo te  hnenah erawh chuan sumfaia pek mai thin a nih thu meetingah hian sawilan a ni a. Khaw thenkhat Bank facilities awmlohnaah te pawh remchan zawkna avangin tanpuina  sumfaia pek mai thin anih thu pawh meeting-ah hian sawi a ni bawk. He hunah hian Bank lama thawktute puihna a awlsam taka Beneficiary ten tanpuina sum an dawng   theih dan turte pawh sawi a ni bawk.