Vawiin khan Lawngtlai DC Conference Hall-ah Bawrhsap Pu N. Chakhai MCS hovin Mizoram Khawpui Fai Inelna 2018 chungchang leh hemi kaihhnawiha hma lak dan tur hrang hrang sawi ho a ni a. LADC-a EM i/c LAD Pu H. Chhuanawma bakah, state leh LADC-a official-te, VC, kohhran, tlawmngai pawl leh a kaihhnawih pawl dang ai awhte an kal khawm.

He hunah hian official lam atangin Mizoramin faina kawnga hma a sawnna tura sawrkar hma lakna pakhat, Khawpui Fai Inelna buatsaih a nih tawh dan leh kumina buatsaih a nih leh dan tur te ngaihthlak a ni a. Lawngtlai DC chuan nikum lamah Lawngtlai khawpui leh Lawngtlai District-in beisei phak lo mah se, kuminah erawh a ti tha ber pawl ni tura hma lak tum a nih thu sawiin, hemi a hlawhtlin theih nana theih tawp chhuaha thawk ho turin kal khawmte chu a sawm nghal a ni.

Khawpui Fai Inelnaa endik dan tur ngaihthlak a nih hnuin, member-te atangin hma lak ngaihna lai leh hma lak dan tura rawtna hrang hrangte ngaihthlak a ni a. Hemi hmang hian hma lak dan tur ruahman nghal a ni. He inelnaa inbuatsaih nan hian Lawngtlai District chuan sawrkar atangin Rs 2,25,600/- a dawng a. Hemi leh mipuite inpekna hmangin faina kawnga hma sawn ngaihna lai apiangah hma sawn tura beih tum a ni a. Hma lakna tur tuahman zingah - ran khuahkhirh, awmze neia bawlhhlawh paih dan phung duan, mipui zirtirna a tam thei ang ber buatsaih leh zirtirna thuziak tar, tuihawk luankawr hai fai leh siam belh, bawlhhlawh bawm sem, khawlaia bawlhhlawh bawm hun belh leh faina hnatlang koh te a tel.

Mizoram Khawpui Fai Inelna 2018 hi nikum lam ang bawkin huang (category) hnih - category-I district hmunpui leh category-II khawpui dangah te then a ni a. September ni 1-20 chhung endikna kalpui tur niin, pakhatnain Rs 1,00,000/-, pahnihnain Rs 70,000/- leh pathumnain Rs 50,000/- an dawng ang a, certificate leh memento pek an ni bawk ang.