Vawiin hian Serchhip DC Conference Hall ah Serchhip District Sanitation Task Force te leh Serchhip khawpui chhunga Branch YMA hrang hrang te, Village Council hrang hrang te chuan Serchhip paltlang tu NH 54 a side drain laia hnatlang koh dan tur an rel.
He rorel kaihruaitu Pi Sangchhin Chinzah, Task Force Chairman leh Bawrhsap ni bawk chuan, nikuma UD&PA buatsaih khawpui fai inelnaah Serchhip chuan kawng dangah Mark hmu tha viau mah se, Mark 15 zet pu side drain lamah kan pachhe em em mai a. A bik takin Serchhip khaw chhung kawngpui ber, km 5 vel zeta thui NH 54 hian Side Drain a neih loh vang a ni. Highway lama thuneitute hnenah kan han thlen thin nain Highway hi tunah Double lane a zauh tura hmalak mek a ni bawk si a, an tan a tihnghaihna tak pawh a awm lova. District Sanitation Task Force chuan ngun taka a ngaihtuah hnuin concrete kher lo pawha side drain laih chhuah vek ngei tha a ti ta a ni, a bawhzui turin Sub Committee Pu VL Remliana, PD, DRDA kaihhruaiin a din a. Tin, sum mamawh zual phuhruk nan Department Officer te hnenah vehbur a khawn bawk a. Tichuan, officer tlawmngaiten thawhlawm Rs. 80,000 chuang an thawh a, chung pawisa te leh State Level Sanitation Task Force atanga side drain component sum lokal te nena belh khawmin side drain chu laih a ruahman a ni, tiin meeting koh chhan a sawifiah a. Hnatlang hi Serchhip a JCB neitute zawng zawng, NH paltlang Branch YMA te leh lei vung paihna chi Truck neitute nen tlawmngaih chhuaha beih tura ruahman a nih thu sawiin, District Sanitation Task Force chuan lirthei tui man te kan pe thei vel chauh dawn a ni, a ti bawk.
Vawiina meeting te chuan hnatlang thawhkhatna atana tun Inrinni lo awm tur Dt. 28.7.2018, Sub Committee in a lo ruahman chhin chu pawmin, Village Council aiawhte chuan an veng chhung Branch YMA hnatlang chhun thingpui man chu thawhlawm tlingkhawm atanga pek ngai lova an lo ngaihtuah sak hlawm theih tur thu an sawi a, NH paltlang chiah loh Branch te pawh an huam chhunga hnatlang lo ko ve tura beisei an ni bawk. Tin, lirthei leh JCB neitute pawhin phur taka an thawhchhuah pui theih tur thu an sawi hlawm a ni.
Side drain laih hnatlang pui koh a nih dawn avang hian kawngpui kama bungrua leh lirthei dah tute chu lo insengfel hmasa tura ngen leh hriattir an ni a, Kikawn atanga Sailiamkawn inkar chu Sector paliah then niin pawl hrang hrangten an thaw kanga, a zo hmasa in a zo hnuhnung an pui zui zel dawn a ni. Hnatlang hi nikhatah thawh zawh hman a nih loh pawhin thawh zui zel tura ruahmanna siam a ni.
