Vawiin hian Serchhip I&PR Conference Hall ah Serchhip District Fisheries Development Officer buatsaihin NLUP-NEDP Convergence hmanga Sangha khawi tanpuina dawng tur mi 25 te hnenah First Instalment Rs. 50,000 theuh semna leh Training buatsaih a ni.

He hun Pi Zonuntluangi, DFDO kaihhruaiah hian Sangha dil siam dan Pu Lalropara, Demonstrator chuan a zirtir a, Sangha dil hi 0.5 Hactares tala zau tur niin a thuk zawng hi 1.5 mtrs to 2 mtrs tur a nih thu te leh Sangha dil siam tura mamawh hrang hrang te a sawi a. Mizoramin sangha a intodelh a tul zia leh Sangha dil siamtute tan hei hi chona lian tak anga ngaih a tul a tih thute a tarlang a ni.

Pi Zonuntluangi, DFDO pawhin thu sawiin, tanpuina dawngtute chu an intiamna lehkha (Certificate) a chuang ang ngeiin engkim dik leh tha taka an kalpui a tul thu a hrilh a, Department in uluk taka an vil zui tur thu leh a tul a pianga tanpui an inhuam thu a hrilh a. First Instalment an pek hnua an hmalakna a zirin Second Instalment pek chhuah chauh a nih tur thu a sawi bawk.

Vawiin training kal te hnenah hian tha taka hnathawk tura an intiamna (Certificate) chu hlan nghal an ni.