Nimin khan Lengpui Community Hall-ah SAGY Phase-II hnuaia Model Village atana thlan Lengpui khua-ah Tourism Awareness Campaign neih a ni. Pu Saitluanga, Joint Director, Tourism Department chuan inkhawm a kaihruai a. Awareness Campaign hi Tourism Department leh Central YMA te tangkawpin an buatsaih a ni a.

Central YMA Vice President Pu R.Lalngheta chuan thusawina hun neiin Lengpui Model Village hi khualzinte lo luhna hmasa ber niin, Mizoram hmel lanna hmasa ber a nih vangin khawlai tih thianghlim kawngah hma la nasa turin leh ruihhlo laka insum leh inthiarfihlim kawngah te pawh hma la turin mipui kalkhawm te a fuih. 

Tourism Officer te pawhin hun hmangin Tourism hmasawnna atana Mizo mipuite pawimawhna leh Sawrkara innghat mai lova mipuite tih theih tawk tam tak te zirtirna leh sawifiahna hun an hmang a. Ram leh hnam tan Tourism hmasawnna tur ngaihtuah hi tu pawhin a ti theih a, eizawnna tlak leh ngelnghet Tourism kaltlang hian a siam theih thu an sawi a ni. 

SAGY in a tum ber chu Model Village a thlan chhuahte hmasawnna kawng hrang hranga hmalakpui niin, zirna in tih changtlun kawngah te, hriselna kawnga hmalakna te leh in leh lo nei mumal lo te chhawmdawl te, Mizo ze mawi chawisan kawnga hmasawn tura mipuite fuihthar kawnga hmalak te a ni.