NLUP Phase II leh Phase III ah te hlawhtlinna sang zawk a awm theih nan uar zawka training, capacity building leh awareness campaign kalpui tum a ni a. Hemi chungchanga line department hrang hrang ten ruahmanna an siam leh a khaikhawmna atana NIB in rawtna a chhawp chhuah te chu nimin khan NLUP Nodal Minister Pu H.Liansailova hovin NIB conference hall ah thlir ho a ni a. Rawtna hrang hrang te sawiho hnuah training kalpuina tura ruahmanna tihfel nghal a ni.

NLUP hlawhtlinna a san zawk theih nan leh a ngelngheh na turin beneficiary te chu uar zawka training neihpui a tul hle tih he meeting ah hian tarlan a ni a. Hei hi central sorkar duh dan a nih rualin NLUP third party monitoring agency, NABCON leh NLUP hmalakna zirtu Synod Social Front te pawhin an ngai pawimawh hle a ni. Beneficary ten an hlawkpui theih dan tur ber thlir chungin senso tlem thei anga training hi June leh September thla inkarah neih zawh vek hman tur a ni.

Nimina meeting ah chuan line department te NLUP sum hman tur K-deposit a la dahsak mek te pawh thlir ho a ni a. Finance Minister ni bawk Pu Liansailova chuan Mizoram sorkar sum dinhmun thlir chungin K-deposit a NLUP sum la awm te chu mamawh mil leh a pawimawh hmasak dan azira pek chhuah ni se, a ti a. NLUP Phase II bakah Phase III atan pawh beneficiary thlan hna chu zawh fel thawkhat niin kalpui ve leh thuai beisei a ni tih a tarlang bawk.

Meeting ah hian NIB Chairman Pu R.Selthuama leh Vice Chairman Pu P.L.Thanga, Chief Secretary Pi L.Tochhong, NIB Official te leh line department hotute an tel a ni.