Ni thum thanga Saitual a tlawh hnuin Home Minister Pu R Lalzirliana chu nizan khan Aizawl a lo thleng leh ta a. Thawhtanni kalta, May 27 khan Saitual-a MLA Football final inkhel a enpui a, Sihfa khuaah Sub District Jail sakna hmun tur enin VC hruaitute leh helai ram neitute a titipui a, an ni pawhin phal taka ram an ruahman sak theih thu Minister hi an lo hrilh a ni. Hemi ni vek hian Saitual leh Keifangah Multishopping Centre hmun tur a thlithlai bawk. Thawhlehni, May 28 khan Home Minister hian Saitual MZP Hqrs. in kumina zirlai hlawhtling thar te lawmpuina hun an buatsaihah khuallian niin zirlai te fuihna thu a sawi a. Pu R Lalzirliana hian nilaini, May 29 khanSaitual leh Keifang khaw chawmtu tur tuilakna hmun ruahman mek Tuivawl a mi chu a tlawh a, PHE Minister Pu S Hiato leh Parliamentary Secretary Pu H Zothangliana ten an tawiawm. Chawhnu lamah Saitual-a Tourist Lodge peihfel tak hawngin Tourism Minister Pu S Hiato leh Parliamentary Secretary ten an tawiawm leh bawk a ni.

Saitual Tourist Lodge hawnna inkhawm, Tourism Director Pu Vabeiha Hlychha kaihhruaia thu a sawiah Home Minister chuan Saitual, Keifang leh a khaw chhehvela sorkar department hrang hrangin hmasawnna chak taka an kalpui mek dan chipchiar takin a tarlang a. Chung zingah chuan Boys and Girls Hostel Keifang leh Saituala sak tur te; naupang 100 awm theihna Tribal Hostel sak mek te; Fire & Emergency Services Building sak mek te; Greater Saitual Water Supply Scheme chak taka kalpui mek te; Saitual Tourist Lodge hawn tak te; Sihfa-a Sub District Jail sak tur te bakah Multishopping Centre cheng nuai 300 senga sakna hmun tur en mek te chu a langsar zual te an ni a. UD &PA department hnuaiah khaw chhung kawng nasa taka cheibawl mek leh a cheimawina chi hrang hrang chak taka kalpui an ni bawk, a ti. Home Minister chuan khawpui laili taka awm Saitual hian tunah chuan khualzin thlenna tur daihzai leh changkang tak a neih belh tur hi thil lawmawm tak a ni a, khualzin veivak te tan remchanna thahnem tak a siam ngei a beisei thu a sawi a ni.

Tourism leh PHE Minister Pu S Hiato chuan tourism hi sorkar sum tuakna tha tak a nih thu sawiin ram thianghlim Israel pawh khu khualzin veivak sum lakluh hmangin khawvelin a chawm rawn a ni deuh thaw a. Chutiang bawkin tlangram mawi leh thengthaw nuam tak, sik leh sa duhthusam nei Mizoram pawh hi cheibawl hranpa ngai lova khualzin te hip thei kan ni hi tun aia tangkai leh zuala kan hman thiam theih nan mikhualte laka hawihawm chhuah chhunzawm zel a pawimawh hle a ni, a ti. Saitual leh Keifang chawm tur tuilakna hmun chak taka kalpui mek chu peihfel thuai a beisei thu leh Mizoram khaw 700 chuanga tuilakna tur kalpui mek pawh hmabak tlemte chauh a awm tawh thu a sawi lang.

Parliamentary Secretary Pu H Zothangliana pawhin Tourism lama sorkar hmalakna tarlangin Chief Minister kaihhruaina hnuaiah Mizoram Tourism Development Board din a nih thu te, Tourism hmasawnna turin road map tha tak siam a nih thu te leh Public Private Partnership (PPP) mode a Tourism hmalakna chi hrang hrang kalpui tum a nih bakah infiamna lama thalai te tuihalna phuhru tura Sports Department nena tangkawpa Aerosports (thlawhtheihna te khalh, paragliding leh a dang te) neih theihna turin Tuirial Airfield cheibawl mek a nih thu a tarlang bawk.

Saitual hi Tourist Lodge hmasa ber, khatih hunlai a IPR & T Deparment in an sakna hmun a ni a. Chu chu hman tlak ni tawh lovin a hmun ngaiah Tourist Lodge thar hi sak puitlin leh a ni. Lodge thar hawn takah hian Cottage Type thlen in chi hrang hrang, Dormitory pali, Dining Hall, choka, reception, waiting room te a awm a ni.

Saitual khaw chhehvel chawm tur Greater Saitual Water Supply Scheme hi chak taka thawh mek niin ruahtui a tlak hma avang erawh chuan hna a khaihlak hlek a. Tuivawl tui hi Bahra lui chhuahah RCC a khuah tum niin tui dawtna khur (jackwell) hmun tur laihfel a ni a, pump house a darkar khata cubic meter 86 zel pump thei tur khawl leh electric motor pawh a hmunah thlen a ni tawh. Saihmar tlanga Tuivawl tui pump chhohna tur tanky lian pawh a bang thlenga zawh tawh a ni a, tui tihthianghlim tawh sa khawlna pui ber bunna tur building pawh zaa 40 (40%) peihfel a ni tawh bawk. Tui tihthianghlim tawh sa pump chhuahna pipe line kilometre 3 zel welding-a phum zawh tawh a ni a, zonal tank hrang hrang Saitual town chhunga awm te atanga mipuiten an tlan theih turin T.Cluster (connection atan) leh public point ah tui pipe hmanga pek theih tura ruahman a ni a, pipe te hi lei tawh niin Saitual thlen vek tawh a ni bawk.