Tunkar hian khawvel pumah ‘Bio-Diversity Week’ hman mek a nih angin vawiin khan Environment & Forests Department huaihawtin Mizoram University Conference Hall-ah ‘Bio-Diversity Week’ puala inkhawm hman a ni a, MZU Vice-Chancellor Prof. R. Lalthantluanga chu Khuallian niin he hun hi a hmanpui a ni.

MZU Vice-Chancellor Prof. R. Lalthantluanga chuan bio-diversity hi khawvelah ngaih pawimawh a hlawh zel avangin UNO chuan kum 2011-2020 chhung hi ‘UN Decade on Bio-diversity’ tiin a puang hial a ni tih a sawi a. ‘Bio-diversity’ hian khawvela thilnung zawng zawng a huam avangin thing leh mau, buh leh thlai, ramsa leh rannung, luia sangha leh thilnung dangte leh kan hmuh phak lo thilnung terueh te te - microbes leh bacteria - bakah boruak, sik leh sa, kan tui hman leh mihring hriselna leh nunna thlengin nghawng a nei a ni, a ti bawk. Mithiamte sawidanin kum 2050-ah chuan tuna khawvela thilnung zaa 30% vel chu hmuh tur an awm tawh lovang a, no hnute pe thin ran (mammals) te zinga zaa 25% chu tun atanga kum 20 chhungin an mang hial tura ngaih a ni bawk, a ti. Mihring ten nungcha leh kan thing leh mau nei te kan tih chereu nasat avanga bio-diversity balance a buai zia sawiin Vice-Chancellor chuan mipui mimir hian he lama tanlak hi scientists te leh a zir mi te tih tura kan dah ringawt hi a tawk lova, kan zavaia tanlak a ngai a, inhrilhriat zel a tul tawh tak zet a ni, a ti.

Vawiin Bio-Diversity Week puala inkhawmah hian Prof.H.Lalramnghinglova, Head, Dept. of Environment Science, MZU; Dr.H.T.Lalremsanga, Asst. Professor, Dept. of Zoology, MZU; Dr.Vidyasagar, IFS, WPO(N), E&F Dept; Dr.Lallawmkimi, Asst. Professor, Dept. of Environment Science, PUC leh Pu Liandawla, Chief Wildlife Warden, E&F Dept. ten bio-diversity chungchanga thil hriat tur pawimawh hrang hrang an sawizau a. He hunah hian E&F Dept. officials bakah MZU-a Department of Environment Science leh Dept. of Earth Sciences & Natural Resources Management zirlaite te an tel a ni.