Vawiin chawhnu dar 2:00 khan Govt. Middle School, Chhinga veng chuan Golden Jubilee an lawm a; Education Minister Pu Lalsawta chuan a hmanpui. Pu Lalsawta chuan “ Kum 50 zet mipuite rawng a bawl chhungin he school hian ram tana mi chhenfakawm tam tak a lo chherchhuak tawh a; hun lokal lehzel turah pawh school chhuanawm tak ni zel turin duhsakna ka hlan a ni”, a ti.

Minister chuan “Mizoram Sawrkarin zirna siamthat hi a ngai pawimawh a; chuvangin Education Reforms Commission pawh India ram state zinga din thei pahnihna ni turin kan din a. He Commission rawtnate tipuitling tur hian Sawrkar chuan thuang hrang hrangin hna a thawk a; nimahsela, heng rawtna zawng zawngte hi rang taka tihhlawhtlin nghal theih a ni lova. India ram zirna siamtha tura din Kothari Commission rawtnate pawh tihlawhtling tur chuan kum sawm tam hun a duh a ni” a ti. Pu Lalsawta chuan zirna chu Mizoram dinchhuahna tura pawimawh ber a nih thu sawiin. “Hnam anga khawvela kan chungchuan theihna leh dinchhuahna tur bul chu zirna hi a ni a; Finna leh thiamna tel lo chuan mihring hi engmah lo mai kan ni” a ti.

Mizoram-a zirna kalphung tharah examination ringawt tinzawn lova, hriatthiamna tak tak nena inzirtir chu ngaih pawimawh ber a nih thu Pu Lalsawta chuan a sawi a. Continuous and Comprehensive Education (CCE) chuan theory ringawt ni lovin, practical a thiamna leh hriatthiamna naupangte rilruah a tuh chho mek a; zirna kalphung thar leh hlui insiamrem lai huna kan awm avangin bahlah deuh angin kan lang mai a ni zawk a ti bawk.

Government Middle School, Chhinga veng hi kum 1963 atanga hawn tan a ni a; khawtlang tangrualin Sawrkar phalna a an din a ni. 1.12.1991 ah Government Middle School ah hlankai a ni a; SSA nena tangkawpin tunah chuan he school ah hian Block Resource Centre te, Training Hall te, SSA Girls’ Hostel te, Laldenga Computer Academy leh Music Academy te a awm a, Headmaster Pu K. Vanlalsiama hovin thawktu 14 leh zirlai za chuang hret an awm a ni.

Vawiina Golden Jubilee lawmnaah hian Education Minister Pu Lalsawta chuan Jubilee lungphun a hawng a; Pu J.H. Biakmawia, Joint Director, School Education chuan Souvenir a tlangzarh a; tlaiah ruai kilho a ni.