Vawiin chawhma dar 11:00 khan NLUP Line Department ai awhte leh NLUP Implementing Board (NIB) hotute chuan NLUP hmalak tawhna te thlir hona leh NLUP kalpui zel dan tur thlir hona Pu P.L.Thanga, NIB Vice Chairman hovin, NLUP Conference Hall-ah an nei.

He meeting ah hian Assembly inthlanpui kan neih avanga NLUP sem mek tih tawp hrih chu Chief Minister in ‘inthlan zawh veleh NLUP sem chhunzawm leh a ni ang’ tia a lo puan tawh sem chhunzawm leh dan tur an sawi ho.

NLUP 2nd Phase beneficiary la pek tlak zawh loh te chu Village Level Monitoring Committee te, District Level Monitoring Committee emaw DC Office emaw atanga pek tlak ni a ngaihte pek nghal an ni ang.

Industry Department leh UD&PA hnuaia khawl chi hrang hrang dawng turte hi hman hmawh zawka sem chhuah nise. Village Level Monitoring Committee emaw, Line Department-a field staff emaw, DC office emaw atanga pek tlaka ngaihte hnenah pek nghal tur an ti bawk.

NLUP 3rd Phase leh 4th Phase beneficiary te chungchangah 1st installment-a sum pek tawh zat te, NLUP hlawhtlinpui tura hmalak mekna leh hmalak zelna atana sum mamawh zat te, leh NLUP Works Calendar-a sum pek dan tur ruahman sa te thlir chungin 2nd installment-a sum pek zat tur hi Line Department tin ten ruahmanna rawn siam sela, an siam peih veleh 3rd leh 4th Phase beneficiary te hnenah sum sem chhunzawm nise tiin an rel.

NLUP kal zel dan tur chungchangah NLUP Apex Board meeting pawh remchang hmasa berah koh nise tiin an rel bawk.

Attachment

  • Loading attachment...