Mizoram hmun hrang hrang a NLUP 2nd phase 2nd installment sem runpui nimina neih ah Thenzawl ah chuan Parliamentray Secretary Lt. Col. (Rtd.) ZS Zuala chuan khuallian chan changin semna hun hmang a. NLUP Implementing Board (NIB) Chairman Pu R. Selthuama, MLA chu khualzahawm a ni.

Thenzawl SDO (C) Pu K. Lalhmuakliana kaihhruai NLUP semna chu Thenzawl Joint YMA Hall-ah inkhawm buatsaih a ni a. He inkhawmna ah hian Parliamentary Secretary Lt. Col. (Rtd.) ZS Zuala chuan retheite dawmchhuahna tura sawrkar hmalakna lian ber zar zo tute chu an sum dawn dik tak leh tangkai thei ang bera hmang tura fuihin, NLUP hlawhtlinna chu anmahni chung liau liau a innghat a ni a ti. Sawrkar chuan hmasawnna kawng hrang hrang chak taka kalpuiin ei leh bar intodelh na tur te, mipui mimir mamawh phuhrukna kawng tinreng a tan a lak te hi tawiawm thiam a thawhpui thin turin a sawm a. Thenzawl chu Mizoram tan a khaw pawimawh anih hre renga, Mizoram pum tih hmasawnna kawnga khaw pawimawh taka siam turin mipui te chu a chah a. Hemi kawngah hian Sawrkar pawhin tih changtlun zel a tum a ni a ti bawk. 

Thusawitu dang NIB Chairman Pu R. Selthuama chuan NLUP thawh thumna pawh sem thuai tum anih thu leh hemi atan hian Sawrkar laipui chuan cheng vbc 370 a phalsak tawh ani a ti bawk.

Nimina NLUP 2nd Phase 2nd installment semna ah hian Sawrkar Department paruk hnuaia trade chi hrang hrang thlang tute hnenah installment hlan a ni a. Heng te hi Horticulture Department, Fisheries Department leh Industries Department atangin mi panga theuh, Agriculture Department atangin mi pali, leh Soil and Water Conservation Department atangin mi pathum te an ni. AH & Vety Department hian tun tum a hnuaia installment dawng tur zawng zawng mi 18 te hnenah a sem kim vek a. Department dang panga te hian tun kar chhung hian vawiina an sem bak zawng chu an sem dawn a ni.