Nimin (4.4.2017) khan Khawbung Community Hall-ah East Tuipui huam chhunga NLUP dawngtu - AH & Vety hnuai Sial leh Zo-bawng vulhtute hnênah NLUP 3rd leh 4th phase tanpuina Rs 80,000 (Singriat) leh Rs. 70,000 (Singsarih) sem a ni a. Bialtu MLA Pu T. Sangkunga chuan NLUP tanpuina sem hi hmanpuiin, an sum dawn chu a hmanna tur dik taka hmang turin NLUP dawngtute a fuih a ni. 

Khuallian chuan beneficiary-te hnenah NLUP chu chhungkaw intunnunna maipiah lama eizawnna ngelnghet siamna atan duan a nih ang ngeiin, mahni inthiam chawpa inchung rangva lei nân te, chhiat tawh thulha mamawh leina tur atan te tia hmanglo turin a chah a. NLUP tanpuina an dawn hma pawha hetiang harsatna hi an lo pal tlang fo tawh a nih avangin tun tuma an tanpuina dawn pawh hi chhungkaw mamawh danga hmang lovin, an hman atanga an thawh chhuah hmangin chhungkaw mamawh ngaihtuah chauh zawk tur a nih thu a sawi a. Hetiang thil pawh ni lo, chhungkaw nawmsakna thil (luxurious goods) - scooty, mobile phone, etc. lei nâna hmangte phei chu hun lo kal zelah pawh an tân dinchhuahna hun remchang a awm a rin loh thu a tarlang bawk. Pu T. Sangkunga chuan Sial leh Zo-bawng vulh chu Tuipuiral ram leilung nena inmil, a hranpaa a chaw zawnsak ngai ve lo, enkawl hautak si lo, hlawk si a nih avangin beneficiary te chuan an hlawkpui ngei a beisei thu a sawi bawk. 

Tun tuma NLUP tanpuina sem hi mi 228 tân Cheng nuai 153 (1.53 crore) ruahman a ni.