Mizoramin kumin August ni 27-30 chhunga North East Zone Inter State Badminton Championship a thlen turah Organizing Committee chuan vawiin khan an Chairman Pu Zodintluanga, Sports & Youth Services Minister hovin a pisaah inbuatsaih dan tur an rel.
Sports Minister chuan felfai leh hlawhtling taka championship neih a nih theih nan organizing commitee member-te chuan an hna theuh tlin taka an thawh a beisei thu a sawi a. Sports discipline hrang hrangah Mizoramin hma a sawn nasat thu tarlangin, chung zingah chuan Badminton chu beisei awm ber zing ami a nih rualin, kum lama naupang zawk leh nakin lawka state aiawha khel thei turte chherchhuah kawngha hmasawnna tur tam tak a la awm thu a tarlang bawk a. Pu Zodintluanga chuan ngawrh taka coaching pek leh court-a player-te an daihrei theih nan fitness lam ngaihpawimawh chu tul a tih thu te a sawi bawk.
North East Zone Inter State Badminton Championship hi kumtin India hmarchhak state ten an in thlen chhawk thin a. Nikum 2016 khan Meghalaya in a thleng a. Mizoram chuan kum 2007 khan a lo thleng tawh bawk a ni. He Championship hian ni li (4) chhung a awh ang a, state tin atangin player 20 leh official pathum (3) an tel theih bakah National leh local official engemawzah an awm dawn bawk a. Senior Team Championship leh Junior Team Championship, mipa leh hmeichhe tan ve ve a awm dawn bakah Individual Event-ah chuan Men, Women, Junior Boys and Girls Singles, Doubles leh Mixed Doubles te a awm dawn a. Tournament hi R. Dengthuama Indoor Stadium, Mualpui a nghah beisei a ni.
