Vawiin chawnhnu dar 1.30 khan Secretariat Conference Hall, New Secretariat Complex, Khatla-ah NLUP Apek Board meeting tum 9-na neih a ni a; he meeting hi Chief Minister leh NLUP Apex Board Chairman ni bawk Pu Lal Thanhawla chuan a kaihruai a ni.

Chairman Pu Lal Thanhawla chuan NLUP chu miretheite leh kuthnathawka eizawngte khaichhuahna tur a nih avanga a buaipuituten pawisa pakhat mah an lo itpui emaw, an lo eipui ve a thian loh thu a sawi a; NLUP dawngtu hmasa zingah pawh mi rinawm, mi dik leh Pathian tihtute chuan dinchhuahna atana an hman thu a sawi. NLUP suma motor lei a tulna chhan pawh Chief Minister Pu Lal Thanhawla chuan sawifiahin, officer tam tak motor neilo leh chhuhsak an awm a, heng officer-te hnathawhna tura motor leina tur sum chu NLUP bultantirh atanga ruahman lawk a nih avanga mipui chanai a heu loh thu a sawi lang bawk.

NLUP hnuaiah hian kum 2010-11 chhungin chhungkaw 45,139 hnenah tanpuina sum ruahman hmasak Rs. vaibelchhe 198.71 atangin September 2011 thlenga pawisa sen tawh chu Rs. vaibelchhe 169.77 a ni. Vawiin meeting-ah hian Minister te, MLA te leh NLUP kaihhnawih officer-te an tel kim hle a; meeting-ah hian kum 2010-11 chhunga NLUP hmalak tawhna thlirlet a nih bakah, MIFCO thuam thar dan tur te, hmunphiah leh agarbati kuang siam dan tur te, NLUP vil dan turte bakah thu pawimawh dangte sawiho a ni.

Vawiina NLUP Apex Board meeting hi sorkar laipui atangin Pu J.S. Samra CEO, National Rainfed Area Authority Govt. of India chu New Delhi atangin a lo tel a. Sorkar laipui chuan NLUP chu beiseina sang tak nen a thlir reng thu a tarlang. District Level Monitoring Committee te chuan an thawk tha hle nia a hriat thu a sawi a, Horticulture leh Agriculture te chu a bik takin Mizoram mipui tam ber te eizawnna hnar anih avangin a pawimawh hle a, uluk lehzual a heng ah te hian tan lak a ngai a ni a ti. NLUP Beneficiaries te hman tura ran note leh thlai chi /tiak pek chungchangah a quality en ngun a pawimawh thu leh a dam rei chen te chik taka zir chian a pawimawh thu te a tarlang bawk. NLUP tanpuina dawngtute hnathawh dan chu anmahni hrilhlawk lova enfiah thut thut pawh a tangkai thei ang a ti.

Vawiin Apex Board Meeting-ah hian District Level Chairman theuhten an district chhunga NLUP kalpui dan report an pe bawk a ni.