Nimin piah khan NLUP Implementing Board Vice Chairman Pu P.L.Thanga hovin line department hotute chu NIB conference hall-ah an thukhawm a. Kumin June 10 a NLUP Apex Board thurel bawhzui na tur ruahmanna hrang hrang siamin hemi zingah hian chak zawka NLUP beneficiary te hnena sum sem chhuahna tur ruahmanna pawh a tel a ni.

Meeting thurel angin line department te chu July thla atang hian thla tin vaibelchhe 30 aia tlem lo hmang zo thei tura hma la tura tih an ni a. Industry department hnuaia puanthui khawl leh carpentry hmanrua atana khawl lian pawn lam atanga siam chawp leh lak luh ngaite chingfel thuai turin ruahmanna siam a ni a. Sericulture hnuaia rangva leh 2nd installment sem tur hmabak chu sem chhuak nghal turin tih a ni bawk a. Horticulture leh Soil & Water Conservation hnuaia thlai tiak phun tur sem dan chu uluk zawka kalpuina turin ruahmanna siam a nih bakah Fishery department hnuaia sangha no sem chu zawh thuai turin ruahmanna siam fel a ni bawk a. Aizawl leh Champhai district chhunga Vety department hmalakna chu kar leh July 15 atangin chak zawka kalpui na tur ruahmanna siam a ni bawk.

He meeting ah hian NIB guideline kalha chhungkaw pakhat atanga mi pakhat aia tam NLUP tanpuina dawn tum te chu dap chhuak a, cancel nghal tura hmalak nghal ni se, tih a ni a. Hna thawk thalo leh NIB ruahmanna ang lova beneficiary inthlahdah te pawh tanpuina pek chhun zawm loh tura rel a ni.