Nikum December 28 a India International Centre, New Delhi- a NLUP chungchang sawihona mithiam rual ten an neih a a sulsutu Center for Agriculture & Rural Development(CARD) chuan NLUP atanga thei leh thlai thar lo pung tur thlirin a chingtute leh Mizoram in sumdawnna lian taka a hman tangkai theih nan Special Purpose Vehicle(SPV) Mizorama dinna tur ruahmanna a rawn siam a. He ruahmanna hi vawiin khan CARD Executive Director, Dr. M.Mukhtar Alam leh NLUP Implementing Board hotu ten Agiriculture conference hall-ah Agriculture department leh Horticulture department hotu te nen an thlir ho.

Mizoram in NLUP atang thei leh thlai a thar te, sum hnar atan leh eizawnna hna siam belhna atan a hman tangkai theih nan thei leh thlai sawngbawl leh hralh chhuah kawnga hmahruaitu Himachal Pradesh tih dan zulzuiin Mizoram-ah Agriculture & Horticulture Processing Company Ltd. din a, hemi hmang hian vaibelchhe 1000 chuang zet sumdawnna lian dinna tur leh mi tam tak tan eizawnna hna thar hawnna turin CARD -in ruahmanna a siam chu Dr. M.Mukhtar hian presentation nen a sawifiah a. He ruahmanna hnuaiah hian central ministry hrang hrang atanga sum hai chhuahna tur leh hemi hmang hian Mizoram hming chawia Mizo brand ei leh in tur siam chhuah leh sumdawnna atana hman tangkaina tur te a tel a ni. NIB Vice Chairman Pu P.LThanga chuan he ruahmanna lo pian chhuah dan tlangpui tarlangin Mizoram tan thil chhenfakawm tak ni tura a ngaih thu he meeting ah hian a sawi a ni.