June 5, 2014 a NLUP Apex Board in a lo rel tawh angin NLUP chu kum 5 piah lam, 2014-15 hnu lama kalpui chhunzawm turin supplementary project chungchangah vawiin khan Chief Minister Pu Lal Thanhawla, NLUP Apex Board Chairman hovin Speaker leh Minister rual te, Mizoram State Planning Board Vice Chairman leh NLUP Implementing Board(NIB) hotute, NLUP kaihhnawih department hotu lian ten NIB conference hall ah High Level meeting an nei.

Chief Minister Pu Lal Thanhawla chuan Mizoram sorkar flagship programme hlawhtlinna turin nasa zawka tan lak thar a tul thu a sawi a. Kum 3 chhunga hmalakna thlir letin hmasawnna tam tak karah beisei anga target phak lohna lai eng emaw zat a awm a. Kalphung thlak danglam leh siam that ngai te siam tha turin Chief Minister chuan ‘kan tih tur apiang naktuk atanga tan nghalin a tul chuan office hnathawh hun piah lam thleng pawhin he project tan hian kan thawk mai tur a ni’ a ti a. NLUP atana thawktu zawng zawngte chu tha thlah lo turin a chah a. NLUP 3rd & 4th phase ah thahnem ngaihna a tlahniam nia a hriat thu sawiin Chief Minister chuan beneficiary te hmalakna enzui kawngah chak zawka monitoring hna thawh a tul a ti a. Hemi kawngah hian line department te bakah MLA te pawh nasa zawka an biala NLUP hmalakna te ngaihven turin a chah bawk.

NLUP Nodal Minister Pu R.Lalzirliana pawhin NLUP hlawhtlinna tura insiam that tulna lai te tarlangin ‘one crop one village’ chu huaisen taka kalpui a tul tih a sawi a. NIB Chairman Pu J.H.Rothuama chuan NLUP kalpui zelna tura kalphung siam that ngai te sawi hova, thahnem ngai taka rawtna te sawiho turin kalkhawm te a sawm bawk a ni.

Vawiina meeting ah hian NIB Vice Chairman Pu P.L.Thanga’n kum 2010-11 atanga tun thlenga NLUP hmalakna dinhmun tarlangin NLUP supplementary project atana pawimawh zual te a sawi a. Kal khawm ten ngaihdan leh rawtna hrang hrang te thawh khawmin supplementary project a hmalakna tur pawimawh te sawi ho a ni a. AH&Vety department ah vawk note leh arnote indaihlohna sutkianna tur te, ran chaw supply leh beneficiary hma la tha lote chungchang kalpui dan tur te; Fishery hnuaiah sangha chi indaihlohna phuhrukna tur te, Horticulture department hnuaia thei leh thlai tiak harsatna sutkianna tur te, Soil & Water Conservation ah rubber nursery enkawlna tur leh thlai tiak mamawh phuhrukna turte; Forest department hnuaia ramngaw siam tharna tur leh Forest Reserved Area hrang hrang mumal zawka chhinchiahna tur te; Revenue department hnuaia ram theh leh ram chungchanga buaina chinfelna tur te, NLUP hnuaia convergence kalpuina turah te ruahmanna siam tur a ni.

Kum 2011 January 11 a kalpui NLUP ah hian Phase I ah beneficiary 45099 awmin Phase II ah 45070 an awm a. Central sorkar atanga sum hmuh tawh zawng hi ACA ah 1208.82 crores niin CSS atana sum hmuh nen a vaiin 1524.92 crores a ni. Tun thlenga beneficiary thlan tawh zat chu 1,29,479 niin Ist & 2nd Phase a beneficiary te hnena sum sem chhuah tawh zat chu Rs.1102.71 crore a ni.