Vawiin khan Mizoram State Tobacco Control Society leh Mizoram Film Development Society tangkawp chuan I&PR Conference Hall-ah “Workshop on COTPA Section 5 with special reference to TV shows & films in Mizoram” tih thupui hmangin inzirtirna hun an hmang. He Workshop-ah hian Pi Lal Riliani, President, Indian Society on Tobacco & Health (Mizoram Chapter) chu Khuallian a ni.
Pi Lal Riliani chuan vaihlo do kawnga pawl hrang hrang hmalaknate leh, he hmalakna tawiawm tura mi thahnemngai an pung zel chu lawmawm a tih thu a sawi a. Chutirual chuan meizial zuk phallohna hmun thenkhat, a bik takin hotel leh restaurant zingah COTPA dan hi duhthusama kalpui a la ni loh chu tan lakna tur a ni, a ti. He huna kalkhawm te chu mipuite zirtirna pe theitu leh kaihruai theitu an nihna hre rengin Dan zawm tur leh mipuite pawh zirtirna tha tak pe chhunzawm zel turin Pi Lal Riliani chuan a ngen bawk a ni.
He huna thusawitu dang Pu Jim K. Chozah, I&PR Director chuan tunlai khawvelah media hmangin awlsam leh rang takin chanchin hrang hrang duh hun hunah a hriat theih tawh a, hei vang hian vaihlo thatlohna inzirtir nan media campaign te hi a tangkai hle a ni, a ti a. Vaihlo do chungchanga mass media mawhphurhnate sawiin, TV programme hrang hrang enkawltute chu an mawhphurhna leh thil tihtheihna hre reng chunga mipuite thil tha lam hawi zawng a kaihruaitu ni turin a chah bawk a ni.
Vawiin hunah hian official pawimawhte bakah Cable Network neitute, Cable Operator, Film siamtute leh Translator-te, TV programme hrang hrang buatsaihtute leh district hrang hrang atangin Cable TV pe chhuaktute thahnem tak an tel a. Workshop hi Session hnih a then niin, Session khatna hi Pu Vanlalrema Vantawl, President, MJA chuan kaihhruaiin, Session hnihna hi Dr. Lalbiakkima, Director, Hospital & Medical Education chuan a kaihruai a. Dr. Jane R. Ralte, State Nodal Officer cum Project Officer, Mizoram State Tobacco Control Society chuan vaihlo khuahkhirhna dan (COTPA) Section 5 chungchanga hriattur tul leh dan zawm ngei ngei ngaite sawina hun hmangin, Pu Laldinpuia Tlau, Civil Judge cum Judicial Magistrate 1st Class hnen atangin COTPA dan leh dun sawifiahna ngaihthlak a ni bawk. Member kalkhawmte chuan he Dan chungchanga rawtna leh hmalakna tur atana an ngaih pawimawhte sawihona hun an hmang bawk.
Vaihlo leh a kaihhnawih khuahkhirhna dan (COTPA) hnuaia Section 5 hian vaihlo fakmawina lam chi engmah a phallo bur a. He Vaihlo khuahkhirhna dan hian mipui hmuh theih tura buatsaih eng programme pawh ni se, TV show emaw film/movies, serial film leh commercial advertisement reng rengah vaihlo fakmawina lam hawi reng reng a khap tlat a ni. Film/Movies, Serial Film leh eng TV programme ah pawh meizu lai a lang a nih chuan Health Warning “Meizuk - Cancer thlentu” emaw “Meizuk – Thihna thlentu” tih tarlan tel ngei ngei tur a ni a, Vaihlo hmuam/ei chi a lan erawh chuan “Vaihlo- Cancer thlentu” emaw “Vaihlo-Thihna thlentu” tih emaw an tarlang ngei ngei tur a ni bawk. Hemi piah lamah hian hetiang telna Film/TV show reng rengah a bul tanna ah leh a laihawlah vaihlo in hriselna a tihchhiat theih dan Health spot (30 seconds aia tawi lo) leh vaukhanna thusawi leh a lem tarlanna (20 seconds aia tawi lo) an tarlang ngei ngei tur a ni bawk.
Dan bawhchhia te chu a vawikhatna ah kum 2 thleng Lungin tan emaw Rs.1,000 thleng chawitir emaw a pahnih (Kum 2 lungin tan leh Rs.1,000 chawi) hmangin hrem theih an ni a, dan bawhchhiat vawi hnihna ah phei chuan kum 5 thleng Lungin tan leh Rs.5,000 thleng chawi a ni thlengin hrem theih an ni.
