Pu John Siamkunga, MLA South Tuipui chuan vawiin chawhma dar 11:00 khan Hnahthial Bazar building-ah Horticulture Department hnuaia NLUP first phase final instalment Serthlum chingtu mi 326 hnenah Rs. 30,000 theuh in Rs. 97,80,000 tanpuina a sem a, Second phase dawngtu mi 585 hnenah Rs. 5,000 theuh in Rs. 29,25,000 sem a ni bawk. A pumpuia sem zawng zawng hi Rs. 1,27,05,000 a ni.

He hun Pu Lalvansanga, SDHO kaihhruaiah hian kuallian Pu John-a chuan kan theih tawkin hna kan thawk ang a, hlawhtlinpui ngei kan tum tur a ni a, hna thawk lova ei kan tum tur a ni lova, i thawk ang u, kan thawh rah vek hi kan seng dawn a ni tiin kal khawm NLUP dawngtu mipuite a fuih a ni.

Hemi hma tukin zing khan Pu John-a hian Tuipui lei dawh hna thawh mek pawh a hmun-ah kalin a tlawh a ni. He lei hi Rs. 2,25,00,000 man tur niin a sei zawng 205meter niin a hlai zawng hi 2.6meter a ni bawk. Tunah hna thawh tan mek niin Guha Niyagi & Associates te thawh niin Pu John-a chuan chak taka hna thawk tur leh harsatna an nei a nih chuan a hnena thlen thin tur a contractor te hi a chah a ni.