Vawiin khan Pu John Rotluangliana, Minister FCS& CA, Transport, Tourism,  Bialtu MLA ni bawk chuan Chhimveng YMA Hall, Mamit-ah Horticulture Department hnuaia NLUP 3rd &4th Phase Final Instalment a sem.

Pu John Rotluangliana chuan NLUP chu mahni a bultan thei lo te tana bul an tanna tura tanpuina a ni a ti a, hei aia mipuite rahbi siam tha tur programme tha hi a awm lo a ni a ti. NLUP tanpuina sem atang hian Mizoramah sial a pung hle a ni a ti a, kan District chu thlai eng chi pawhin a ngeihna hmun a nih avangin Lakhuihthei pawh hmun dang aiin a thlum bik a ni a ti bawk.

Bialtu MLA hian Assembly Constituency tinah beneficiaries 400 sem leh tur a ni a ti a. Kan ram leh hnam than zelna turin NLUP chu kalpui zel a ni dawn a. NLUP dawng theuh theuhte taima leh tihtakzeta hmala leh hmala lote dinhmun a inthlau zel dawn a. Ti tha duh lova ei zo nghal ringawtte chu nakinah an fate'n ka pa NLUP indawng ve lo em ni tiin an la zawt ang che u a ti. Kan District-ah pawh NLUP Kut siam a ni dawn a, hemi atan hian an huan leh lote tun atanga lo enkawl tha turin a chah a ni.

He hunah hian Pu PC Lalthanzuala, , Minister tawiawmtu pawhin thusawina neiin NLUP dawngtute chu tha taka an pawisa dawnte hmang a, hlawhtlinpui ngei tur in a chah bawk.

Vawiin Programme hi Pu C.Lalawmpuia, SDHO, Mamitin a kaihruai a. NLUP 3rd Phase-ah hian Mamit Constituency huam chhunga khaw 11 a Benefiaciaries 46 te tan Rs 1,302,253/- semchhuah a ni a. NLUP 4th Phase-ah hian Mamit Constituency huam chhunga khaw 8 a Beneficiaries 44 te hnenah Rs 1,290,960/- semchhuah a ni bawk.