Vawiin khan Parliamentary Secretary Pu Lal Thanzara chuan zankhat riak turin Ngopa khua a thleng a. Kawtchhuaha amah lo hmuaktute hnenah thuchah sawiin Pu Lal Thanzara chuan, “NLUP thatzia hi a dawngtute chauh ni lovin a la dawng ve lo te pawhin an hmuchiang zel a, a tira ruahman lawk chhungkaw 120000 tana tih chu chhungkaw 20000 danga belhchhah a ni dawn a. Mi state ah chuan loneitute hi loan hmanga tanpuina pekte an ni hlawm a, loan rulh theih loh avanga mahni intihlum an tam em em a ni. Chutiang kara Mizoram sorkar-in kuthnathawktute leh miretheiten eizawnna bul an tanna atana pawisa leh hmanrua te, ranvulh tur a semte hi a thlawn liau liau a ni a; he NLUP hlawhtlinna hi Mizoram kil tina a dawngtuten an seng mek a ni” a ti.

Power chungchanga Mizoram dinhmun sawifiahin Pu Lal Thanzara chuan, “Power supply duhthusam kan neih loh chungchangah sorkar chuan theihtawp a chhuah a; MW 60 pechhuak thei tura ruahman Tuirial Hydel Project kha tihpuitlin ni sela chuan, kan tharchhuah ve MW 10 leh phai atanga kan lei nena tangkawpin load-shedding ti lovin kan awm thei tur a ni a. Chuvangin power a kan harsatna chungchanga indem vak vak hi a tul lovin, Mizote tih atan a mawi lo  a ni. Sorkar chuan Tuivai Hydel Project MW 210 thar thei tur chu Central Sorkar sum senso vek hmanga khuah turin chak taka kalpui a ni a; a thawktu tur pawh thlanfel thuai kan tum a ni. Tun dinhmunah hmarchhak state dangte pawh power supply ah an indaih bik lova, a leina tur sum nei pawh ni ila duh zat zat lei tur a awm chuang lo a ni” a ti.

Mizoram kawngpuite chu siamthat hna thawh mek anih thu Pu Lal Thanzara chuan sawiin, “ Tunah hian Silchar-Aizawl-Saiha highway chu siamthat leh tihzauh mek a ni a. Aizawl khawpui kawng leh kawng penhlehte pawh chei mek a ni bawk a. Kawngpui dangte pawh a tahtawla siam zel tum a ni. Gas harsatna pawh tunah chuan a ziaawm tawh hle a, kan harsat vanglai kha tuialhthei leh gas bika khawvelin harsatna a tawh vanglai nen a innang a ni tih kan hriat tlan a tha a ni” Pu Lal Thanzara chuan a ti bawk.

Pu Lal Thanzara hian zaninah Tuiphal Group YMA Conference, Ngopa khuaa neih mek chu a hmanpui ang a, naktukah NE Khawdungsei a PWD hmunhma tur buatsaih mek leh kawng awm dante a enfiah ang.

Parliamentary Secretary hi Pu Vanlalsawma, Jt. Registrar, Cooperation te,  PWD SE leh EE ten an tawiawm a ni.