Vawiin khan Home Minister Pu R. Lalzirliana chuan Saitual Group YMA Conference vawi 18-na Tualbung Community Hall-a neih mek, a ni hnihna chu khuallian niin a hmanpui.

Home Minister Pu R. Lalzirliana chuan YMA chu Mizo nun zemawi kengkawhtu leh vawnghimtu anih thu sawiin YMA chu mite tan malsawmna a ni a, a bikin mi harsa leh hmeithai te YMA in tha leh zung senga in an sak sak te chu a ropui hle a ni, a ti a. Thalai nun tam tak suattu ruihhlo lakah YMA beihpui thlak leh an hmalakna te phei chu Sawrkar pawhin a zui zo lo fo thin a ni, a ti a.

Pu R Lalzirliana Mizoram ah hian chi bil emaw, hnam bil anga hmalakna leh hnam anga inlak hranna te chu thil tha lo anih thusawiin Mizorama cheng Zo hnahthlak hrang hrang te chu unau vek kan ni a, Mizo chu hnam khat a ni, a ti a. Tawng hrang hman avang emaw, ngaihtuahna hrang neih avang emaw in kan in enhrang tur a nilo a, Mizo inpumkhatna leh tanrualna atan mitin in theihtawp kan chhuah a, rilru zau tak kan put a tul a ni, a ti bawk.

Home Minister chuan YMA leh Sawrkar inlungrual taka kan kal chho hi a zahawm a, vantlang rawngbawlna kawnga Sawrkar nek emaw, nawr emaw te hi a thalo a, Sawrkar chuan dan leh hrai a nei a, chu chu kan zawm a, kan tawiawm tur zawk a ni, a ti a. NGO ten vangtlang hmun atan hmun awl zim te te kan hauh thin te hi sim a tha a ni tiin sum hi hlimna leh tanrualna a ni lo a, pawl din chan leh a thil tum te chu ngaihtuah chian a tul fo thu a sawi bawk.

Pu R. Lalzirliana chuan YMA member kalkhawmte chu Mizo nun zemawi, tlawmngaihna leh aia upa zah thiamna te chu chhawm nung zel turin leh heng te hi a taka an nunah lantir turin a chah a ni. Home Minister hian Saitual Group YMA hnuaia YMA Branch 18 te chu chhiatni thatni a an hman atan Silpaulin pakhat theuh pek tur thu a puang bawk a ni.

Vawiin chawhma programme ah hian CYMA President Pu T Sangkunga pawhin thu sawiin CYMA in hmachhawp a neih te thenkhat a tarlang bawk a ni. Saitual Group YMA hnuaia hian YMA Branch 18 a awm a, Conference-ah hian palai 450 vel an tel a ni.

Saitual Group YMA Conference hi nimin khan tan niin naktuk thleng a awh dawn a. Vawiin chawhnu programme chu Chalfilh bialtu MLA thar Dr. Ngurdingliana’n a hmanpui a, naktuk programme chu Art & Culture Minister Pu P. C. Zoramsangliana’n a hmanpui ve thung dawn a ni.