Indian Chamber of Commerce buatsaih Business Meet with Myanmar , nimin a neih ah Pu S. Hiato Industries Minister leh Myanmar Union Minister for Agriculture & Irrigation U Myeint Than chuan inkawmna hun tha tak an nei a.

Myanmar Minister U Myeint Than chuan Pu S. Hiato leh India sumdawng lian tak tak aiawh te chu Myanmar chu investment atan a an in hawn zau zia a hrilh a. Myanmar Investment Commission chu investor te chungchang buaipuitu an nih thusawiin investors te tan Myanmar chu an sum peipunna tha tak anih theih thusawiin hemi chungchang hi chipchhiar takin a sawi bawk.

Pu S.Hiato hi Indian Delegation-ah Minister awm chhun anih avangin team leader ang din hmunah dingin Myanmar Sawrkar Transport Ministry nen in kawmna tha tak an nei chhun zawm nghal a. Myanmar Union Minister Transport Ministry hi Myanmar ah a awm loh lai a nih vangin India delegates te hi Deputy Minister Han Sein leh Director General Soe Tint ten an lo dawng sawng a. Pu S. Hiato hian India delegates sumdawng hausa tak tak te chuan nasa takin Myanmar hmasawnna atan an puih theih tur thu sawiin Akyab port peih fel thuai a nih theih nan tan la turin Transport Ministry chu a ngen a.

Deputy Minister pawhin India nena road connectivity Mizoram kal tlang a awm turah hian an phur hle thu a sawi a. Akyab port hi container cargo pangai size tur a buatsaih tum a ni a, an port neih sa hian China leh Singapore nen a connect laiin Akyab port a taka hman anih hunah chuan insumdawn tawnna tha tak a nih ngei tur thu sawi ho a ni. Pu S. Hiato hian map nen kawng kal dan tur te a hrilh fiah a, hmun thenkhatah road diversion siam a tul na lai te thlir ho a ni a, Myanmar lam atang a clearance mamawhte pawh lo en fel sak thuai turin a ngen a ni.

Mizoram leh Myanmar chuan inlaichinna tam tak kan neihte hmang tangkai in India leh Myanmar in education lam hmalakna an neih ah pawh Mizoram literacy a sang tak pawh hman tangkai thin ni se a duh thu a sawi a, in kawmna duhawm tak an neih theih avangin lawmthu a sawi bawk a ni.

Myanmar hian Rice leh Timber an thawn chhuah laiin Oil palm an la lut a, heng connectivity te hi peih fel a nih hunah Oil palm leh thil dang engemaw zat Mizoram atang an lak luh theih tur thu te an sawi ho a ni.

India Delegates te hi ICC leh FICCI member te a ni a, heng meeting te hi Myanmar capital thar Nay Pyi Taw ah neih a ni a. Nay Pyi Taw hi Yangon atanga darker 5 vel tlan a ni. Naktuk khian Delegates te hian Sittwe an tlawh anga, ni 8 a Kolkata kir leh turah beisei an ni.