Vawiin chhun dar 11 khan Secretariat Conference Hall ah NLUP Nodal Minister Pu H.Liansailova hovin NLUP thawh hnihna leh a hnulam zel atana beneficiaries thlan dan tur leh trade tih fel dan tur te an sawi ho a. Meeting ah hian District tin Deputy Commissioner te, Directorate leh District tina Line Department Nodal Officer te an kalkhawm a ni.

Minister Pu H.Liansailova chuan NLUP chu rualkhai taka kalpui zel a nih theih nan thawh hnihna leh thumna atana beneficiaries tur thlan chu ngun tak leh uluk taka kalpui a pawimawh thu a sawifiah a. NLUP thiltum leh kaihhruaina zulzui zela hmalak a ngaih tur te a tarlang nawn bawk.

Meeting ah hian NLUP thawh khatna tuna kalpui mek chungchang thlirletin District Implementing Committee Chairman / Deputy Commissioner ten an district huam chhunga an hmalak dan te report an pe a, tluang taka kalpui mek a nih thu an sawi hlawm a ni. District lamin mamawh leh harsatna an tawhte thlirhovin meeting chuan Village Level Monitoring Committee tihchak nan bawhzui mek a nih thu te, NLUP vil leh monitoring hna thawh nana motor mamawhna phuhruk nan tunah hian Gypsy 36 chah mek a nih thu tarlan a ni bawk.

Minister chuan NLUP chu sawiselna neuh neuh awm mah se Sorkar chuan a kalpui zel dawn thu a tarlang a. DC ten phur tak leh chak taka an hna pangangai baka NLUP an kalpui chu Chief Minister-in lawmawm a tih thu a tarlang bawk. Department Officer te chu an thiamna rinchhanin Sorkarin NLUP mi rethei te chhanchhuah nan a kalpui mek a ni a, a bawhzui tu tak tak chu nangmahni vek in ni tiin an thawhrimna azarah NLUP chu a hlawhtlin ngei a rinawm thu a sawi lang bawk. Mizo mipui rilru chu mahni ta ngei tur leina ah pawh hlep duhna kan nei tlat tawh hi a pawi tak zet a, a lehlamah chuan taima taka thawka hlawhtlinpui tum mi thahnemngai tam tak an awm bawk a ni, a ti. Hnathawk tura fuiha kan kaihhruai thiam phawt chuan mi taima leh thawkrim, hlawhtling tur mi tam tak an awm a ni a ti. NLUP hmang hian kan ram kan khaichhuak thei dawn tiin Minister chuan kan thlahte nghawng tur hna kan thawk mek a ni, a ti. Kuthnathawk mi harsa te dawmkana chhanchhuah chu Sorkar thupui a nih angin MLA te pawhin theihtawp chhuaha NLUP hlawhtlin nana Department te thawhpui an inhuam thu a hrilh a, hmun hrang hrang hma an lakna ah bialtu MLA te rawna thawhpui thin turin NLUP nodal officer kalkhawm te chu a chah bawk. NLUP kaihhruaina anga Trade thlan chungchangah pawh an hlawhtlinpui ngei tur, eizawnna leh innghahna tlak tak tak beneficiary te thlanpui a pawimawh thu sawi nawnin Minister chuan Department Officer te chu beneficiary te uluk tak leh thahnemngai taka kaihruai chhunzawm zel turin a fuih bawk.

Vawiin meeting ah hian NLUP thawh hnihna atana mi 45000 thlan tura ruahmanna hnuaiah line department hrang hranga beneficiary awm tur zat chu a thuphungin pawm a ni a, a tul dan leh remchan angin la tihdanglam theih a ni ang. Trade thlan fel chungchang chu District tinah Deputy Commissioner hova la chinfel tur a ni.

NLUP thawh hnihna ah hian beneficiary 45,000 thlan tura ruahman a ni a, thawh khatnaa 45,139 thlan tawhte nen a zavaiin mi 90,139 an tling tawh ang a, thawh thumna ah chuan a pumpuia khuh zo vek tawh tura ruahman a ni.