Nimin ni 18.10.2011 chawhma dar 11:00 khan Tualvungi Hall, Thenzawl-ah Oil Palm ching duh te zirtirna leh NLUP sem leh tura mipui ten Oil Palm chin an thlan theih nana zirtirna hun District Agriculture Office Serchhip-in a buatsaiha, loneitu mi 167 an tel.

He inkhawm hi Pu L. Sailova VCP, Thenzawl chuan kaihruaiin, Dr. C. Lalzarliana, Director Of Agriculture(CH) Mizoram chuan khuallian niin a hmanpui a ni. Khuallian Dr. C. Lalzarliana, chuan thu sawiin Mizoramah hian ram zawl leilet leh terrace atana siam theih 78080Ha a awm a, chung zingah chuan 1200Ha vel chauh siam a la ni a, heng ram zawng zawng hi tun tum NLUP-ah hian kan siam zawh theih chuan ei leh barah kan intodelh theih a beiseiawm thu a sawi a, NLUP hian a tum ber chu eizawnna ngialnghet neiha nih avangin Oil Palm chin hi a thain a rintlak ber dawn a ni a ti a. Kan rama kan thlai te hian natna an ngah em em a, chumi enkawlna tur atan chuan kan sum neih leh kan thiamna te a tawk lo fo thin a. Amaherawhchu khawvel hmun hrangte thlirin Oil Palm hi kum tam tak an lo ching tawh, natna hri avanga thih puk pukna thlen ve ngai lo a nih avangin kan chin atan a tha hle a ni a ti.

A hralhna thuah pawh Pu Zara chuan harsatna a awm loh thu sawiin, a sawngbawlna tur factory pawh a la awm hma pawhin a hralh nghal theih a ni a ti a. Kan rilrua kan ngaihsan tur dik tak chu mi intodelh te hi hi ni sela, “NLUP hi engtika dawn tur nge?” tih ai chuan “Engtika thawh tur nge?” tih a kan ngaihtuah zawk hi a tul hle a ni a ti bawk.

He hunah hian Pu R.K Nithanga, i/c Oil Palm, Directorate of Agriculture leh Pu Lalthansiama, District Agricultural Officer, Serchhip District-te chuan Oil Palm chin thatna leh hlawkna te an sawi bawk ani.