Aizawl khawpui huam chhunga NLUP hnuaia trade chungchang sawihovin vawiin chawhma dar 11 khan I&PR Auditorium ah Aizawl veng tina Village Level NLUP Implementing Committee hotute an kalkhawm a, NLUP Implementing Board Secretary Pu Zorammuana, Addl. D.C. Pu J.Hmingthanmawia lel Industries Jt. Director Pu Lalhmunsiama te hovin Aizawl khaw chhunga NLUP tanpuina dawng tur ten hlawhtling zawka an kalpui theih nana trade siam fel dan tur te an rel ho.

Mizoram puma Cluster 40 awm zingah Aizawl khawpui chhungah Cluster 10 a awm a, hemi huam chhunga beneficiary awm zat chu 8,809 niin chung zinga ram neia chhinchhiah chu mi 418 chauh an ni. Trade siamrem ngai awm reng thin chuan harsatna a siam thin avangin chumi pumpelh nan trade thlan chungchangah felfai tha zawka kalpui tura hmalak mek a ni a, kum kalta lama NLUP 1st Phase kalpui dan kawnga harsatna tawh te sawihovin hriatchian loh lai te an inhrilhfiah a, Desktop Publishing leh Auto-Rickshaw trade-a NLUP tanpuina la pek loh te chu instalment-a sum inpek chi a nih loh avangin a hlawmin 2nd Phase ruala pek tur an nih thu inhrilhfiah a ni.

NLUP beneficiary te chu an dinhmun kimchang zawka chhinchhiaha, an hna thiam zawng leh ei zawn nana thawh mek te chu a remchan anga NLUP hnuaia chhawmdawl zui chi an nih leh nih loh te ngaihtuaha hmalak ni se tiin an rel a, chutianga a tul anga lo bawhzui turin Village Level Implementing Committee te kutah dah a ni. Eizawnna nazawng erawh NLUP hnuaiah khung a rem loh thu inhrilhfiahin, hmuh theih leh endik theih (tangible & monitorable) a nih ngei a ngaih thu tarlan a ni bawk.

NLUP tanpuina inpek mek ah mahni trade thlan loh trade danga inthlak sak chungchang lo chingfel turin NLUP office lamah bawhzui mek a nih thu sawi lan a ni bawk.