Cheng nuaih 22.6 senga sak Saihnuna Hall chu Rural Development Minister Pu R.Lalzirlianan nimin December ni 6, 2011 chhun dar 12:00 khan Leng khua ah a hawng.

Hall hawn inkhawmah thusawiin Minister chuan an khaw lal hlui hming chawia Hall tha tak an sa chu lawmawm a tih thu sawiin tunlaiah khawvel hmun hrang hrang ah mipuiten an lalte an ning a an duhloh avangin buaina a chhuaka, hetih laia Leng khaw mipuiten an lal hlui chawimawi nachang an hria hian lal tha, khua leh tui hmangaihtu leh khua leh tui ten an hmangaih an nei tih a tilang chiang em em a ni a ti a, thangthar lo awm leh zel tur te pawhin an hriat reng theihna tur atana hma an la hi a ropui tak zet ani tih thu a sawi a ni.

Minister chuan Leng khaw bialtu E.Lungdar B.D.O leh VC te leh mipuite inlungrual tlanna a hmu chu fakawm a tih thu sawi lang bawkin thil tha neih hi an phu a ni a ti a, khawtlangin an khaw ram chhunga ramngaw te an humhalh dan a hmuhin lawmawm a tih thu a sawi a, ramngaw chereu zel tur ven kawnga nasa lehzuala tan la chhunzawm zel turin a chah bawk a ni.

Minister chuan Rural Development Department-in zokhua te hmasawnna atana tan an lak nasat thu sawiin Community Hall phei chu Border Area Development Programme (BADP) huam chin khawtin deuh thaw ah hmuh tur a awm tawh thu a sawi a, sawrkar pawhin theihtawp chhuahin hma a la chhunzawm reng a ni a ti a, IWDP Scheme chu IWMP scheme ti a hming thlakin Sawrkar laipuiin kalphung thar a duang a, he scheme kaltlang hian Irrigation, Social Forestry, Horticulture adt. ah te hma lak a ni dawn tih a sawi a, mipuiten he scheme hi tangkaipui ngei tura lo ngaihvenpui ve a lo zir chiang ve turin a ngen a ni.

NREGS avanga inthlahdah mai a hlauhawm thu sawi langin Pu Zira chuan kuthnathawh leh lo ram neihte thulh phah loh a tha a ni a ti a, NREGS inhlawhna hi chu kan hna dangte rawn phuhru tu atana ngaih mai tur zawk a ni tiin VC ringawt nilovin khawtlangin a huhovin thawh zel tum tur a ni a ti bawk. Sawrkar kum thar lo awm tur atang chuan NREGS sum lo kal ah material component hi 20% chauh ani tawh dawn a ni tih sawiin mipui tam zawk inhlawhtheihna tura ruahmanna siam tum a ni a ti bawk.

NLUP chungchang pawh sawi lang in thudik hrula mipuite thudiklo hrilh thin an awm chu pawi a tih thu sawiin NLUP chu tha taka hmang apiang an lawm dawn a, sawrkarin a tih tur a tih hnu chuan a dawngtute rilru hi NLUP hlawtlin thu ah chuan a pawimawh ber tawh a ni a ti a, theihtawp chhuaha din chhuahpui ngei turin mipuite a fuih a, NLUP hian zoram mipuite hnenah hahdamna tha zawk leh rilru hriselna tha zawk pe se a duh thu a sawi bawk.

Corruption chungchangah pawh Minister chuan do rem vek a harsat tur thu a sawi a, a pung zel tur erawh hi chu kan dang thei a ni tiin, mahni kan intodelh theuh theih phawt chuan corruption hian min tibuai loving a ti bawk.

Leng khua Community Hall hi Leng khaw dintu hmasa leh Leng lal ni bawk Saihnuna hmingchawia sak niin, he hall sakna tur sum hi BADP scheme atanga hmuh a ni a, kum 2005-2006 ah Rs 3 lakhs in bul tan a ni a, kum 2006-2007 ah Rs. 3.5 lakhs, 2007-2008 ah Rs. 3.1 lakhs, 2008-2009 ah Rs. 3 lakhs, 2009-2010 ah Rs. 5 lakhs, 2020-2011 ah Rs 5 lakhs hmuh niin a vaiin Hall sak na atan hian Rs. 22.6 lakhs sen ral a ni a, Hall len zawng hi a dung feet 72 leh a vang feet 35 a ni.

Saihnuna Hall hawnna inkhawm hi Pu K.Laltlawmlova, B.D.O, East Lungdar R.D. Block in a kaihruai a, khawtual mipui kal an thahnem hle a ni, tlaiah hall thar lawman ruaipui theh niin zan lam thlengin hun hlimawm tak hman a ni bawk.

Leng khua hi kum 1897 a din niin East Lungdar R.D. Block huam chhung East Lungdar atanga km 12 vel a hla a awm a ni a, in 100 khua niin an inchhal a, kumin hian Serthlum an thar tha hle a, chhungkaw thenkhat chuan Rs. Nuaih 4 aia tam te an hlawhchhuak a ni.