Vawiin khan I&PR Auditorium-ah Aizawl khawpui leh a chheh vel khuaa Village Level Monitoring Committee Chairman leh Secretary te training neih a ni a, NLUP a lo hlawhtlin zawk theih nan NLUP montiroing chungchanga Village Level NLUP Monitoring Committee (VLMC) te leh NLUP Line Department te thawhho dan tur chungchang an zir a ni.

Aizawl District Level Monitoring Committee Chairman Lt. Col(Rtd) Z.S.Zuala chuan nu leh pa tam takin mahni fate bultan nan cheng singkhat em pawh an pek theih loh laia sorkarin rethei dawmchhuahna tur NLUP sum thahnem tak a pe chhuak thei hi thil vanneihthlak a ni, a ti a. Hmang dik leh hmang tangkai te chu pek chhunzawm zel an nih dawn avangin a dawngtute pawhin rilru leh tih tak zeta hma an lak nan Monitoring Committee member te chu an bial chhung theuh vil ngun turin a chah a ni.

District tina NLUP kalpui dan enthlithlai tura din Monitoring Committee theuh te leh NLUP Line Department te thawhho dan tur duan fel ang chuan NLUP Line Department ten endik hna an tih dawnin VLMC an hriattir tur a ni a, an thil hmuh dan report-ah pawh Department Offcial leh Committee Chairman/Secretary emaw in hming an ziak hnan tur a ni. Trade tina dawngtute hming te chu Line Department te hian VLMC te hnenah pek vek tur a ni a, tanpuina dawng chhunzawm tlak lo nia an ngaih te pawh VLMC-te nena sawihova thutlukna tawp an siam tur a ni.