Nimin khan Health Directorate Conference Hall, Dinthar-ah Health Minister Pu Lalrinliana Sailo hovin Rastrya Swasthya Bima Yojana (RSBY) hnathawh thlir letna neih a ni a. He hun hi Pi M.Zohmingthangi, Secretary, Health in a kaihruai a, District hrang hranga Chief Medical Officer(CMO), Medical Superintendent leh Private Hospital aiawhte pawh an tel tha hle a ni.

He hun hmanpuitu Health Minister Pu Lalrinliana Sailo chuan RSBY hi State economy tih tha tham a ni a, hemi scheme hmang thei tura registration tihna kawngah mipuite than harh leh zual ngai hle a ni, a ti. Veng tin leh khawtinah registration tih theih hun chhung hawn lai hi mipuiten ngaih pawimawhna chang hria a, thlalak te a ngaih avangin chhungtin ten bengvar thin se a duh thu a sawi. District tina CMO, Medical Superintendent leh an hnuaia thawkte pawhin thahnem ngai leh zual turin a fuih. Hriselna lam dah pawimawh hian ram hmasawnna hial a thlen theih avangin natna laka invenna hrang hrangah pawh tan lak leh zual a, tunlaia natna tlanglawn tak Hepatitis C pawh fimkhurh loh vanga kai a ni tlangpui a, vanduai vanga kai chu zaa 10 emaw lek chauh an ni zawk, a ti. Minister chuan thawktute pawh theih ang apianga thuam changkan zel sorkarin a tum a ni, a ti. Pu Lalrinliana chuan damdawi in hrang hranga damlote chhawr tangkai tur tangkafai Rs.45,82,268 chu damdawi in enkawltute hnenah a hlan a ni.

Mizoram State Health Care Chief Executive Officer Pi Liankhumi chuan Health Care Scheme chu Insurance Company kuta dah tawh lovin Society-in a buaipui vek tawh thu leh hemi atan hian thawktu tur Officer 4 leh staff 21 lak belh te nen Society chuan chak takin hna a thawk mek thu a tarlang a ni. Kumin September thla atanga vawiin thlenga bill chinfel tawh zat mi 138 tan Rs.20,52,177 a nih tawh thu leh chinfel mai thei tur cheng nuai 24 a awm mek thu a sawilang bawk. Kum 2010 atanga 2011 chhungin Insurance Company-ah bill 8494 lutin bill amount chu Rs.10,53,97,071 a ni a. Heng bill lut zingah hian 8120 pawm niin Rs.10,05,52,394 a ni a, bill chinfel tawh zat Rs.58,719,242 niin mi 5660 hnenah pek chhuah tawh a ni tih Pi Liankhumi chuan a tarlang bawk. NIC a bill la tang zat hi Rs.27531981 zet a la awm thu leh vawiin hian Rs.25,30,091 mi 27 hnenah NIC hian an pe chhuak nghal dawn a ni, a ti.

Dr.Biakthansangi, Dy.CEO, Health Care pawhin presentation pe in Mizoram State Health Care Society hnuaiah Empaneled Private Hospital Aizawl-ah Alpha Hospital, Kulikawn; Adventist Hospital; Bethesda Hospital; Grace Nursing Home; Greenwood Hospital; Nazareth Hospital; Synod Hospital; Lunglei-ah Serkawn Christian Hospital, Saiha-ah Maraland Gospel Centenary Hospital; Lawngtlai-ah Lairam Christian Medical Centre leh Christian Hospital, Champhai-ah Med-Aim Adventist Hospital leh Kolasib-ah Nazareth Hospital te an nih thu sawiin phailama in enkawl ngai te erawh chu Board kal tlang a tul thu a sawilang bawk.